Necochea, Argentina. Seigarren, eta azken, irudi kronika. Argentinako euskal diasporaren urteroko topaketaren amaierara iritsita, Euskal Asteko igande goiza, ohi bezala, mezarekin hasi zen. Honakoan hitzordua Nuestra Señora de Nueva Pompeya Parrokian izan zen eta euskal etxeetako ohorezko guardia bertaratuta. Zeremoniekin jarraituz, hurrengo agertokia Dardo Rocha plaza izan zen, bertako eta Euskal Herriko agintariek lore eskaintza bana eginez Gernikako Arbolaren kimuaren aurrean.
Partaide izan ziren, besteak beste, Necocheako alkate Arturo Rojas, Eusko Jaurlaritzako Hezkuntza sailburu Jokin Bildarratz, Eusko Jaurlaritzako Kanpo Harremanetarako idazkari nagusi Marian Elorza, Euskadiren Argentina-Mercosurrerako ordezkari Sara Pagola, Kanpoan den Euskal Komunitatearentzako zuzendari Gorka Alvarez Aranburu, Etxepare Euskal Institutuko Euskara Sustatzeko eta Zabaltzeko zuzendari Monika Madinabeitia, FEVAko lehendakari Arantxa Anitua eta Necocheako Euzko Etxea-ko lehendakari Cristina “Kiti” Zubillaga.
Alardea eta azken agurra
Hirurehun dantzarik baino gehiagok hartu zuten parte 61 kalean eskainitako alardean, ikusleak mila inguru zirela.. Agintarien tribuna ofizialaren aurrean dantzariek Aurreskua, Ezpata Dantza, Lore uztaiak, San Migel, Arku Dantza, Fandango, Ari Arin eta, ixteko, “chacarera” argentinarra dantzatu zuten.
2023ko azaroaren 12an, lore-eskaintza; eta dantzarien alardea, Necocheako 61 kalean
Ondoren, bildutakoak pixkanaka Euskal Etxearen egoitza aldera erretiratzen joan ziren, bertako jai areto nagusian eta kirol kantxa handian egokitutako jangela erraldoian egingo zen bazkari jendetsura biltzeko. Bazkaria arratsaldeko azken orduetaraino luzatu zen eta agur esateko orduan, “Bahian elkar ikusi arte” ugari entzun ziren, hurrengo Euskal Aste Nazionala 2024ko azaroan izango baita hiri horretako Unión Vasca euskal etxea antolatzaile.
Lagun bati bidali
Komentarioa gehitu
