euskal diaspora eta kultura
2011/09/28
Berlingo Euskal Etxeak gonbidapena zabaldu du ostiral honetan Cervantes Institutuaren egoitzan egingo den 'Gernika eta alemaniarrak' izeneko ekitaldira bertaratzeko. Bi zati izango ditu jarduerak: hasteko, Klaus Ihlauren 'Gernika' dokumentalean bonbardaketatik bizirik atera zirenen eta alemaniar pilotoen testigantzak entzun eta ikusiko dira; ondoren, Walther Bernecker historialariak 1937ko apirilaren 26ko gertaera traumatikoak euskal-alemaniar harremanetan izan duen isla azalduko du. Ekitaldia Etxepare Institutuarekin eta Cervantes Institutuarekin lankidetzan antolatua da.
2011/09/13
Itxaropen euskal etxeak antolaturik, garrantzi handiko bi ekitaldi burutu ziren Buenos Aires probintziako Saladillo herrian azken bolada honetan. Alde batetik, Pablo Picassoren koadrorik famatuaren analisia eskaini zien Elena Itceak Saladilloko Mitre Liburutegian bildutako entzuleei. Beste alde batetik, Lagun Onak abesbatzaren kontzertu batez gozatu ahal izan ziren herritarrak Marconi antzokian. Urte osorako egitaraua jarraituz, urriaren 22an Che que Parché taldearen bisita jasoko dute euskal etxeko kideek.
2011/06/21
Datorren ekainaren 29an Montevideoko Centro Euskaro elkarteak ehun urte beteko ditu eta egitarau zabala antolatu du data esanguratsu hau ospatzeko. Mendean zehar gorabeherak izan ditu elkarteak, baina ehun urte bete eta ekinean jarraitzeak merezi du ospatzea eta horretan dihardute egunotan. Mendeurreneko ekitaldiak datorren astelehenean, ekainaren 27an, hasiko dira eta larunbata bitartean luzatuko dira. Hitzorduen artean, besteak beste, urteurrenari buruzko seilu baten aurkezpena eta Euskal Etxeen Nazioarteko Mus Txapelketa bat izango dira.
2011/05/19
Caraceseko Eusko Etxeak Jazoera buletinaren bigarren alea argitaratu du, elkartearen apirileko eta maiatzeko egitasmo eta ekimenen berri emateko bere bazkide eta lagunei. Albistarian Euskal Herritik etorritako berririk ere badago, Galdakaon egin zen euskal-venezuelarren urteroko topaketaren kronika, kasu. Irantzu Leundak bidaltzen du. Aberri Eguneko ospakizuna ere gai nagusienetakoa da eta datozen hitzorduak aipatzen dira, horien artean Amatxuei Omenaldia eta Pintxo Lehiaketa.
2011/05/05
“1937ko apirilaren 26an eta Espainiako Gerraren testuinguruan hegazkin alemaniarrek Gernika herrixka bonbardatu zuten. Zibilen kontrako lehenengo erasoa izan zena, gertaera gogoangarrienetako bat bihurtu zen mendebaldeko herrialdeentzat. Hori dela eta 74. urtemuga honetan aipamen berezi bat merezi du Gernikako Bonbardaketak”. Hitz hauekin gonbidatu zuten Mar del Platako Denak Bat Euskal Etxeko kideek bertako komunitatea San Martin plazan burutu zen zeremonian parte hartzera. Izpiritu berarekin bildu ziren Euskaldunak Denak Bat eta Zazpirak Bat-eko lagunak Gernikako kimuaren ondoan data goibel hau gogorazteko.
2011/05/02
Patinez, txirringaz, oinez eta nola ez, korrika, ibili ziren hirian zehar Necocheako euskaltzaleak euskararen aldeko jaia ospatzeko. Korrikaren 17. edizio honetan, Euzko Etxea-ko kideek bat egin zuten Euskal Herriko 'euskalakariekin' eta eskuz esku pasatu zen lekukoaren mezua irakurri zuten ibilaldiaren bukaeran euskal etxearen egoitzaren aurrean. Pazko igandean, berriz, hiriko Dardo Rocha plazan bildu ziren Necocheako euskaldunak, oraingoan Aberri Eguna eta Gernikako Bonbardaketa oroitzeko. Hona hemen argazki eta bideoak.
2011/04/27
Iragana ezagutzea beharrezkoa da historiako gertaera ilunenak ez errepikatzeko. Eta hori da Argentinako euskal etxeen helburua urtez urte Gernikako Bonbardaketaren urtemuga ospatzen dutenean. Herri batzuetan, etxekoen arteko ekintzak burutzen dira biktimen omenez; beste batzuetan, berriz, komunitate osoari zuzendutako ekitaldiak gauzatzen dira, euskal diasporan murgilduta ez daudenek 1937. urtean Bizkaiko herrian gertatu zena jakin dezaten. Euskal Herriarentzat hain garrantzitsua den egun honetan, Gral. Villegas hirian 'Guernica' izeneko plaza inauguratu da.
2011/04/26
Euskal Herriko eta Diasporako herri askotan gogoratuko da gaur Bizkaiko herriak pairatutako erasoa. Argentinan, Trenque Lauquengo euskaldunek ere euren omenaldia egin nahi izan diete gertakariko biktimei; karia horretara Picassoren margolan ezagunaren bertsio bat inauguratuko dute gaur bertan euskal etxeko areto nagusian. Bonbardaketaren urteurreneko ekitaldiaren testu-inguruan, Gernikari buruzko hitzaldi bat emango du Gral. Villegaseko Sergio Recartek eta zeremonia bukatuta, mokadu eta edariak eskainiko dira.
2011/04/06
Indarrez beteta ekin diote 2011 honi Buenos Aires probintziako Chascomuseko 'Zingirako Euskaldunak' Euskal Etxeko kideek. Urtarrilean neska eta mutil mordo bat bildu zen Argentinako bigarren Udalekua eta San Juango Eguzkiaren Jaian izandako partaidetza jarrera horren oso adibide onak dira. Hilabeteak aurrera doaz eta mugimendua ez da gutxitzen euskal etxean. Bigarren sorreraren 20. urteurrenaren urtean, hitzaldi, erakusketa, ikuskizun eta jaiekin sendotuko dute euskal presentzia Chascomus hirian 'Zingirako Euskaldunak'-eko lagunek.
2011/03/21
Joan den martxoaren 12an, Buenos Aires probintziako Gral. Villegas herriko komunitateak bere euskal etxearen X. urtebetetzea ospatu zuen. Urteurreneko ekitaldiak Gernika Plaza Txikiaren inaugurazioarekin hasi behar bazuten ere, eguraldi txarrak egitaraua aldatzera behartu zituen antolatzaikeak, eta jaia gaueko 10etan hasi zen erakundearen egoitzan. FEVAko lehendakaria den Ricardo Basterra eta bertako udaletxeko nagusia, Gilberto O. Alegre, presente egon ziren garrantzi handiko festa honetan eta beste gonbidatuekin batera euskal musika eta dantzez gozatu ahal izan zuten.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
