euskalkultura.eus

Buenos Aires/Mexiko Hiria. Diasporako lagunen seme-alaben jaiotzen arteko ibilbide honek Argentinan dauka lehenengo geldiunea, Buenos Aires probintziako Las Flores herrian, bertako 'Loretako Euskaldunak' Euskal Etxeko lehendakari den Graciana Goicoechandiak eta Alejandrok 3.820 gramo pisatu dituen Leire txikia, euren lehenengo alaba, izan baitute martxoaren 16an. Lehendik ere hamaika gauzatan sartua zen Gracianak badu orain zeregin berria, zalantzarik gabe orain arteko bizitza arras aldaraziko diona.

[Lara Irina Borras jaio da 2010eko martxoaren 29an Entre Rios probintzia argentinarreko Paraná hiriburuan, Federico Borras Alcain eta Maria Fernandaren bigarren alaba]

Argentinan baita ere, baina iparralderago joz, Entre Ríos probintziako Paraná hiriburuan, lehenengo argia ikusi du martxoaren 29an Lara Irina ttipiak, (Urrundik Euskal Etxeko lehendakari den) Federico Borras Alcain eta Maria Fernandaren bigarren alabak. Pare bat aste dira Federicok bertan zuzentzen duen Presencia Vasca irratsaioak 20 bete izana ari zirela ospatzen, eta orain bestelako bozkario honen txanda etorri da. 3.275 gramoko pisua eman du.

Eta azkenik --argazkirik oraindik iritsi ez zaigula-- joan den asteartean, apirilaren 13an, gaueko 9:30etan bertako orduan, Begoña munduratu zen ;exiko Hirian, euskal komunitateko kide ezaguna den Goyo Blasco Jr. eta May-ren alaba. Jaiotakoan 3.640 gramo pisatu zituen eta 51 zentimetro neurtu. Ama eta alabatxoa ondo daude; aita lerdea dariola... aiton-amonak loriatzen... Osaba-izebak irria ezpainetatik kendu gabe... VascosMexico foroak jaiotzak sortu duen poztasuna islatu du.

Zorioanak Leire, Lara Irina eta Begoñari, eta euren guraso eta familiako eta lagunei!