euskalkultura.eus

Mexiko DF, Mexiko. Vascosmexico taldearen hamargarren urteurreneko jaiaren emaitzarekin oso pozik agertu dira bai antolatzaileak eta baita bertara bildu ziren lagun andana ere. Mexiko DFko Alaia jatetxea izan zen festaren gunea, eta han, Alberto Ituarte sukaldariak prestaturiko afari goxoaren inguruan, hamar urte hauengatik topa egin zuten elkarteko kideek.

Vascosmexico posta zerrenda izan zen hasieran, eta handik sortu ziren ondoren webgunea eta elkartea. Hamar urteotan Mexikoko euskal komunitatearen topagune birtuala bilakatu da eta euskal mexikarrek elkarren berri izateko erabiltzen duten tresna nagusienetakoa da. Bidean, makina bat eragozpen gainditu ditu taldeak, Jaione Arrieta Galarraga sortzailearen ahaleginari esker eta taldeko kideek elkartasunak lagunduta. Larunbateko afaria eginahal horien guztien arrakasta ospatzeko unea izan zen, eta, aldi berean, aurreneko pausoa ere, beste hainbeste urte betetzeko bidean.

Jaia arratsaldeko seiak aldera hasi zen eta kideak garaiz iritsi ziren, nahiz eta une horretan bertan euri zaparrada itzela bota zuen Mexiko Hirian. Aretoa jendez lepo, lagunak agurtzeko unea dezente luzatu zen. "Han izan ziren hamar urteotan gurekin izan diren lagunak, batzuk hasiera-hasieratik, eta beste batzuk beranduago; baina denak ala denak maiteak. Batzuk festan elkar ezagutu genuen aurrenekoz eta oso hunkigarria izan zen. Zinez, bibrazio onak nagusi ziren!", adierazi du Jaione Arrietak. 

[Festako giroa oso ona izan zen eta bertaratu zirenek gaualdi ederraz gozatu zuten (argazkia Vascosmexico)]

Lagunak agurtu ostean, bederatziak aldera hasi zen afaria, Alberto Ituarte sukaldariak prestatutako menu gozoarekin. Bazkalostean giroa bikaina izan zen, Xabier Errasti lagunak soinua hartu eta euskal kanta herrikoiak jotzen hasi baitzen. Laguntzaile aparta izan zuen Errastik, izan ere Miren Aguirrek mikroa hartu eta mahairik mahai ibili zen, bertara bildu zirenei abesteko eskatuz. "Kantari bikainak izan genituen, besteak beste Ormaecheatarrak edo Julen Ruiz de Azua; eta besteak ez hain onak; hori bai, gogo biziz abestu zuten denek", esan du Jaione Arrietak. Abestien ostean dantza egiteko ordua heldu zen eta afariko kide gehienak dantzalekura atera ziren, lotsarik gabe eta giroaz gozatzen jarraitzeko gogoz.

[Xabier Errastik giro ederra jarri zuen bazkalostean eskusoinuarekin (argazkia Vascomexico)]

[Miren Aguirrek taldeko kideak kantuan jarri zituen (argazkia Vascosmexico)]