euskalkultura.eus

Queretaro, Mexiko. Vascosmexico A.C. elkarteak Eguberriko ezusteko atsegina ekarri du, artisau mixtekek eginiko lauburu original bat plazaratu baitu. Bitxiak 460 pesotan (25 eurotan) saltzen dira eta salmentarekin eskuratzen diren irabaziak komunitate mixtekoarentzat eta Vascosmexico elkartearen onuran izango dira. Vascosmexiko Mexikoko euskal komunitateko hainbat kide biltzen dituen taldea da eta komunikazioa sustatu eta euskal informazioa eta berriak zabaltzen ditu Mexikon, euskalmexikarren artean sare trinko eta eraginkorra osatu duelarik.

Jaione Arrietak, Vascosmexicoko sortzaile eta koordinatzaileak, lauburu berezi honen ideia nola sortu zen azaltzen du. 'Zilarrarekin eta ehun mixtekekin, hau da, leinu honetako kideek egiten dituzten ehunezko emaitzekin bitxiak egiten dituen bitxigile bat ezagutu nuen. Eurek egiten duten zilarreria aparta da. Kontua da ehun mixtekekin eginiko lauburu baten lagina eman eta gauza berri bat enkargatu niola, diseinu original eta %100 euskalmexikar bat'. Lankidetza honetatik sortu den lauburuak 2.5 cm bider 2.5 cm-tako tamaina du, .925 zilarrarez egina dago eta atzealdean duen ehuna indiar mixtekek egina da.

Lauburu original, berritzaile eta nortasunduna

Mixtekoak Mexikoko Oaxaca estatuan bizi dira nagusiki eta euren zilarreria eta artisautza, batez ere ehunak, oso ezagunak eta apreziatuak dira. Lauburuak antigoaletik mixtekek euren ehunetan erabiltzen dituzten kolorezko hariekin eginda daude. [Irudian, eskulangile mixteko bat ehuna lantzen (argazkia Vascosmexico)]

Diseinu berriak harrera ezinhobea izan du Mexikoko euskaldunen artean: lehendabiziko lauburuak aurkeztu eta ordu gutxitara agortu ziren  --'hegan egin zuten', zehazten du Jaione Arrietak--. Elkartea sorta berri bat prestatzen ari da eta dagoeneko lagun askok eskatu dute beraiena. Vascomexico taldearen posta zerrendaren bitartez, berria, elkarteak Euskal Herrian dituen lagunengana ere heldu da eta askok eskatu dituzte jada euren 'made in Mexico' lauburuak. Bitxi bakoitzaren prezioa 460 peso (25 euro) da eta horri bidalketaren gastuak gehitu behar zaizkio. Ordaintzeko PayPal sistema arin eta segurua erabil daiteke.

Lauburu euskal-mexikarrara erosi nahi dutenek eskaria vascosmexicoac@prodigy.net.mx e-mailera idatziz egin dezakete.

Vascosmexico elkarteari buruzko informazio gehiago bere webgunean: ww.vascosmexico.com