euskalkultura.eus

Ayacucho, Argentina. Jendea euskal etxera erakartzea eta momentu onak pasatzea izan zuten helburu nagusi Euskal Odola-k gauzatutako bi elkarretaratze hauek. Eta ondo asko bete ziren biak. Udaberriaren atarian, ‘Udaberri alaia’ delako moda desfilea antolatu zuten Ayacuchoko lagunek, urriaren 8an. Herriko neska ugari pasatu ziren udako arropak erakutsiz moda ibiltoki bihurtutako euskal etxeko egoitzatik.

“Proposamen erabat ezberdina izan zen eta azpimarratu nahi dugu burutu ahal izateko ezinbestekoa izan zela herriko denden laguntza, hala nola hauen izenak aipatuz Ilusiones kirol denda, Puerto de Lilas, Proxima Estación, Monigotes, Marian Jatip, Hermanos Correa, La Tapera eta Susu Urbina”, jakinarazi digute Ayacuchoko euskal etxetik. “Bestetik, eskertu nahi diegu Graciela Lopezde Guazzeli-ri, Nilda Martiren de Lynch-i, Susana Cano-ri eta Jose Cirelli-ri ekimen honen alde egin duten lana. Eta aipatu behar dugu baita ere soinu-sistemaren arduraduna Jose Rios izan zela eta argiena, Federico Garberi; eta ikuskizuna gauzatzeko lankide izan genituela Ciganda, Perez, Derdoy hirukotea eta Romina Aneas Staff Dantza”, azaldu digute Euskal Odolatik.

Tango argentinarra eta euskal zaporeak

Urriaren 13an egindako jaian, berriz, euskal etxearen egoitza dantza-pista bihurtu zen. Izan ere, Ayacucho bertako ‘Tango Cristal’ musika taldeak bere ikuskizuna eskaini zuen Euskal Odolaren egoitzan. Musikaz gozatzeaz gain, gonbidatuek euskal plater tipikoak dastatzeko aukera ere izan zuten.

Euskal dantzak Belen Zabaletak zuzentzen duen euskal etxeko dantza taldearen eskutik iritsi ziren. Eta tango eta ‘milongen’ artean, fandango batzuk ere dantzatu zituzten etxeko gazteek. Tandileko Gure Etxea-ko dantzari batzuek ere hartu zuten parte Ayacuchoko festa honetan.