euskalkultura.eus

Donostia-San Sebastian. Jende askorentzat gauza berezia da atzerrian egonik bertsolaritza bezalako euskal kultur adierazpen bat entzun eta bizi izatea. Bertsolariak, ordea, gero eta zabalagoa daukate euren esparrua, baita esparru geografikoa ere, lehenengo eta behin euskal diasporari eta munduan barreiatuta dauden euskaldunei esker, baina baita ere bertsolaritza bezalako fenomeno batek guregandik aparteko hainbat jenderen artean pizten duen interesa medio. Oraingoan, bi bertso saio bereziren berri ekarriko dizugu, aldi berean adieraziz hegazkin txartelak erosteko urteko sasorik onenean gaudela, prezio merkeenei dagokienez. Hona bada.

Estatu Batuetan, Kalifornian, Euskal Herriko oraingo bertso txapelduna eta aurrekoa, Maialen Lujanbio eta Andoni Egaña, martxoaren 13an arituko dira South San Frantziskon, bertako Euskal Etxean, San Frantziskoko Euskal Etxeak --Basque Clubek-- bere berrogeita hamargarren urteurrena ospatzeko antolatu dituen jaietako parte. Euskal Herritik joango diren bi bertsolari hauekin batera, bertako beste lauk kantatuko dute, hala nola, San Frantzisko bertako Johnny Kurutxet eta Gratien Alfarok, Renoko Jesus Goñik eta Wyomingeko Martin Goikoetxeak. Saioaren (16:00etan) ondotik, 19:00etan afari herrikoia izango da. Bertso saioan eta afarian parte hartzeko idatzi etcharren@msn.com helbidera edo deitu 001 650 8717347 zenbakira. Dena den, informazio gehiago, hemen.

Gaur aipagai dakarkigun bigarren saioa Euskal Herritik hurbilago izango da, Europatik atera gabe, Irlanda Iparraldean, Belfasten. Bertso Dinnera deitu diote eta hau maiatzaren lehenean gauzatuko da. Hirugarren Bertso Dinnerra dute hirian, bertako euskaldun talde batek antolatua, eta Maialen Lujanbio txapelduna eta Euskal Herriko Txapelketa nagusi berean hirugarren gelditu zen Jon Maia bilduko ditu kantari. Informazio gehiagorako, idatzi bertsodinner@gmail.com helbidera edo deitu 0044 786 2217414 zenbakira. See you there!