euskalkultura.eus

euskal diaspora eta kultura

Albisteak rss

Rocío Luces, bertsolari uruguaiarra: 'bertsoak eta euskarak mundu berrietara lehioak ireki dizkidate'

2009/02/17

Rocio Luces bertsolari uruguaiarra (argazkia Conny Beyreuther)
Rocio Luces bertsolari uruguaiarra (argazkia Conny Beyreuther)

PUBLIZITATEA

Bertsolari aldizkariaren azken aleak atzerritik heldu eta Euskal Herrian bertsolaritzaren zirrara deskubritu duten gazteen esperientzia dakarkigu. Dzenana Usanovich bosniarra, Elyem eta Nemma Chej saharauiarrak eta Rocío Luces euskal-uruguaiarra dira horietako batzuk. Jarraian Rociori eginiko elkarrizketa laburtzen dugu, bere esperientzia Diasporako gazte askorentzat ezaguna edo interesgarria delakoan.

Algorta, Bizkaia. Rocio Luces Algortan bizi da eta beti euskaraz egiten ahalegintzen dela azaltzen du. 'Horrela, izan ere, ez didate igartzen kanpokoa naizela. Espainolez egiten badut, ordea, berehala hasten dira galderak, ea latino-amerikarra naizen, eta antzekoak'.

Montevideon jaio zen eta oroimena duenetik joaten zen hango Euskal Etxera. Amaren gurasoak euskaldunak zituen eta beste etxe askotan familia bazkariak bezala, harenean igandeetan Euskal Etxera joatea zen ohitura.

Bertso-Hop

Rocio euskal dantzak ikasten hasi zen eta gero, hamalau urterekin, euskara. Hasieran Montevideon bertan, eta gero Argentinan. Hemeretzi urte bere arte ibili zen horrela eta gogoan du, orduan izan zuela lehen aldiz bertsolaritzaren berri. 'Irungoa genuen irakaslea eta Negu Gorriak taldearen kasete bat ekarri zigun. Bertan zegoen Bertso-Hop kantua, Egaña eta Peñagarikanoren bertso famatuekin egindakoa, eta asko deitu zidan atentzioa', kontatu du. 

Rocíok, izan ere, Amerikako payadoreekin konparatzen zituen bertsolariak eta harrigarri egiten zitzaion, haien ruralismoaren aldean, ze modernoak ziren euskaldunak, ze kaletarrak ziren.

Bertsolaritza 0-tik hasita

1997an etorri zen lehen aldiz Euskal Herrira eta Lazkaoko barnetegian eta Anoetako saio batean entzun zituen lehen aldiz zuzenean bertsolariak. Duela sei urte etorri zen Euskal Herrira bizitzera eta halako batean, Algortan 'Bertsolaritza 0-tik hasita', eta zalantza egin gabe apuntatu zen. Jose Landeta irakasle zuela bi hilabeteko ikastaroetan ibili zen pare bat urtez, joan den ikasturtean Bertso Eskolan sartzea erabaki zuen arte.

Nongoa den galdetuta, naturaltasunez erantzun du bi lekutakoa sentitzen dela: 'hangoa eta hemengoa. Hemen nagoenean euskaldunagoa eta han nagoenen uruguaitarragoa'. Internetek gaur egun gauza asko errazten omen ditu, eta horregatik, sorterria beti gogoan badauka ere, herrimin berezirik gabe darama bizimodua Euskal Herrian. Beretzat euskara beste mundu baterako lehioa izan dela esanez despeditu gaitu. Eta urrunean, besoaz agur eginez, gehitu du: 'Eta bertsoa ere bai'. 

[Bertsolari aldizkarian argitaratua, Josu Martinezen artikulu bat da. Jatorrizko artikulua eta aldizkari osoa irakurtzeko, jo hona.]



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia