euskalkultura.eus

euskal diaspora eta kultura

Albisteak rss

Paraguain, Asuncion-go Jasone Euskal Etxeak gaur arratsaldez ekingo dio euskara eskolen ikasturte berriari

2010/03/15

Jesus Nazabal Jaka berastegiarra harbelean, Asuncion hiriburu paraguaitarreko 'Jasone' Euskal Etxean iaz eman zituen euskara eskoletako batean (EE argazkia)
Jesus Nazabal Jaka berastegiarra harbelean, Asuncion hiriburu paraguaitarreko 'Jasone' Euskal Etxean iaz eman zituen euskara eskoletako batean (EE argazkia)

PUBLIZITATEA

Gaur arratsaldean ekingo zaie 2010 ikasturte berriko euskara eskolei hiriburu paraguaitarrean. Abenduan bukatu zen ikasturteari amaiera polit eta ondorio positiboduna eman ondoren, Asunciongo Jasone Euskal Etxea irrikaz ari da eskola berriak noiz hasiko zain, euskara ikasten hasi den taldea gehienbat oinarrizkoa bada ere, gogo handiz eta iaz emandako urratsak berritu, areagotu eta sakontzeko asmo biziz baitator, euskal elkarteak buletin honi jakin arazi dionez. Eskolak Asunciongo leku berean gauzatuko dira, esan nahi baita Euskal Etxearen egoitzan, lehenengo hitzordua gaur iluntzeko zazpi t'erdietan izango delarik. Euskara eta euskal kultura ezagutzak eskuratu edo hobetu nahi dituzten jendeak oro daude gonbidatuta.

Asuncion, Paraguai. Joan den ikasturteko eskolak abenduan arrakastaz bukatu ondoren, indar berriturik egin dute deia hiriburu paraguaitarreko Jasone Euskal Etxekoek, ikusiz Paraguain ere posible dela euskara ikasten interesatua egon daitekeen pertsona talde bat osatzea eta gerora hazten ahal den hazia erein dela, orain egoki ureztatu eta gora egiteko esperantzan.

Aurtengo lehenengo klasea gaur iluntzeko zazpi t'erdietan. Hortik aurrera, klaseak astero astelehen eta ostegunetan izango dira, zazpi t'erdietatik bederatzi t'erdiak arte, Asunciongo Jasone Euskal Etxean, "Casa Vasca de Asunción del Paraguay, Juan Manuel Frutos Pane 268, casi Río de Janeiro" helbidean.

Klaseetan parte hartzeko deia Euskal Etxeko bazkide eta lagunei egiten zaie lehenik, baina berez interesa daukan jende guztiari daude zabalik. Euskara ikasteaz gain, euskal kultura ere aipatzen da eskoletan eta baita ere ikasleak aipatzen dituzten Euskal Herriko euren sorterri edo gustuko lekuen berri ere.



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia