euskalkultura.eus

Valencia, Venezuela. Caraboboko Unibertsitateko Jessy Divo de Romero errektoreak bihar zortzi, asteartean, martxoaren 23an, ezarriko dizkio Zuzenbideko Ohorezko Doktoregoaren ezaugarriak Carabobo estatuko Valencia hiriburuan egoitza duen Notitarde egunkariko zuzendari den Laurentzi Odriozola Echegaray-ri. Divo de Romeroren esanetan, unibertsitateak eman dezakeen aitortzarik handiena Odriozolari emateak garrantzi berezia hartzen du, "Venezuelan, zailtasun, gatazka eta egoerak larriak bizi baititugu, non zoritxarrez ados ez gauden gauzak salatu eta esateko oso kuraiatsua behar den izan".

Errektorearen Bulegoko buletinak biltzen duenez, unibertsitateburuaren ahotik, "Laurentzi gizon kuraiatsua da, baina batez ere Notitardeko zuzendari gisa daukan arduraren aurrean gizon objektiboa, orekatua eta justua, eta nik uste dut balio horiek bat datozela gaur erakunde honetatik defendatzen ditugun balioekin".

Erbesteratutako belaunaldiko partaide

Bere aldetik, Pablo Aure, aitortza hau bideratu duen bulegoko koordinatzaileak azpimarratu du euren asmoa izan dela Laurentzi Odriozolari ematen zaion Ohorezko Doktorego hau "etsenplua izan dadin nazio osoarentzat, geure Caraboboko Unibertsitatearen eskutik, adierazpen askatasuna hain kolpatua dagoen krisialdi honetan, bidezko errekonozimendua emanez gizarte komunikatzaile lanetan kuraiez ari den, eta Notitarde egunkariaren ildo editorialaren bidez ez dela amore eman behar, ez dela bildurrik izan behar eta zailtasunen gainetik aurrera egin behar dela esan duen gizon honi, adierazpen askatasuna astindu nahi duen sistema bati aurre egiteko modu bakarra, hain zuzen, jendeaurrean ipintzea nahi ez dituzten gauzak, jendaurrean ipintzea dela esan duen gizon honi".

Laurentzi Odriozola Echegaray hilabete batzuk bakarrik zituela sartu zen Euskal Herritik Venezuelara, aitamekin, Francoren altxamenduarekin hasitako gerlarengatik erbesteratu behar izan zuen belaunaldiko partaide; bere kasuan 1939ko uztailaren 9an sartu zen La Guairako portura, erbesteratuen lehenengo untzian, Cuba izenekoan. Joan den azaroan hain zuzen, garai hartan venezuelaratu zen erbesteratu belaunaldi osoari omenaldia egin zitzaion Caracasko Eusko Etxearen eskutik, Odriozola bera tarteko.

Honoris Causa Zuzenbide Doktore titulua emate ekitaldia 2010eko martxoaren 23an egingo da Caraboboko Unibertsitateko Paraninfoan, arratsaldeko bostetan, erakin historikoan, Zuzenbide Fakultate ohian, Kolonbia kalean, Valencia Venezuelan.