euskalkultura.eus

euskal diaspora eta kultura

Albisteak rss

Galdutako dantza tradizionalak berreskuratuko ditu Oskorrik Zugarramurdiko Sorgin Egunerako

2010/06/18

Oskorri taldea.
Oskorri taldea.

PUBLIZITATEA

Kantari jarri zituen Oskorrik zale eta adiskideak, eta orain dantzari jarri nahi ditu ikusleak. Hitzordua bihar izango da, ekainaren 19an, Zugarramurdin, udako solstizioa ospatzeko antolatutako ekitaldi magiko, esoteriko eta festa girokoan. Dantzak ikastea erreaztearren, ekimena Youtuben sartu da eta bideoak jarri dira sarean Oskorri Dantzak izenarekin; gauzak animatu eta dinamizatzeko ekimen beraren baitan, Oskorri Dantza Kluba izenekoa ere sortu du musikari talde bizkaitarrak, honi buruzko informazioa egokiro eta garaiz banatzearren.

Zugarramurdi, Nafarroa. Euskal Herriko dantza maisu Juan Ignazio Iztuetak (1767-1845), 1789ko Frantziako Erreboluzio Handiak ekarri moda berrien poderioz Gipuzkoako Antzinako Dantzen galera bat-batekoa ezagutu zuen bere gaztaroan eta joera galkor horrek, izan ere, jakingarri ugari eta partitura asko gordetzea ekarri zuen. Orain, Oskorri musika taldeak, dantza-doinu horietako batzuk prestatu eta, Baztango Dantzariak taldearekin batera, publiko zabalak dantzatzeko modu errazean birsortu ditu.

Oskorri formatu berri batez plazaratuko da uda honetan. Modu bikoitzean azalduko da agertokietan, kontzertu misto gisan, Oskorriren Kontzertua + Dantzaldia Oskorri Baztango Dantzariekin. Formula berri honen estreinaldia bihar bertan, larunbata, eginen da, arratsaldeko 20:00etan, Zugarramurdiko Sorginen Egunean, “Aita semeak”, “Furra furra”… eta Oskorriren kantu ezagunenekin batera, zazpi dantza berri estreinatuko dira. Nahi duten guztiek dantzok ikas ditzaten, bideo batzuk eseki ditu Oskorrik Youtuben Oskorri Dantzak izenpean, eta internet bitarteko Oskorri Dantza Klub delakoa sortu du. Izan ere, natxooskorri@euskalnet.net helbideraidazten duten guztiei, aurrerantzean prestatzen joango diren dantzen musikak, bideoak eta kontzertu berrien deialdiak helaraziko zaizkie.

Zugarramurdi, bien bitartean, biharko, esan nahi baita ekainaren 19ko Sorginaren Eguna prestatzen ari da. Udako (neguko) solstizioa ospatzeko ekitaldi ugari antolatu dituzte.

 



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia