euskalkultura.eus

Concordia, Argentina. Gizataldeen Jaien barne egin da joan den larunbatean Concordian Iparreko Geltokia izan zenaren tokian Immigrantearen Erregin Probintzialaren aurtengo lehiaketa. Jendez ongi hornitutako ekitaldi batean, Frantses Gizataldeko hautagaiak, Daiana Ayelén Arletaz Ferreyrak, jaso du erregin-makila, eta berarekin batera hautatu dituzte lehenengo printzesa Euskal Gizataldeko ordezkaria, Nerea Gonzalez Ovcharenko, eta bigarren printzesa Siriar-Libanoar Gizataldekoa, Guadalupe Solange Pietrantueno Krunfli. Judutar gizataldeko ordezkariak, berriz, Iara Musicovsky Portnoy-k, Kultur Enbaxadari onenaren izendapena hartu du.

Nerea Honzalez Ovcharenkok 17 urte dauzka, bosgarren maila ari da ikasten Concordiako Aingeruetako Amaren Eskolan eta Psikologia nahi du ikasi. Ez da euskal etxetik etorritako hautagaietan gora egin duen lehena, azken urteotan, esaterako, Concordiako Euskal Gizataldeko ordezkaria izan zen Maria Pia Mario-Hirigoyen Erregin Probintziala hautatu baitzuten 2006an, eta Gimena Ibarra, berriz, Miss Atsegina 2007an.

Larunbatean Erregina eta bere kortea hautatu ondoren, atzokoa izan zen aurtengo Concordiako Gizataldeetako Jaiaren azkeneko eguna, Azoka eguna egun osoz izan zelarik. Gizatalde bakoitzak bere gastronomia erakutsi eta dastagai ipini zuen eta, ohi bezala, partaideen kabalkada egin zen hiriko kaleetan zehar, euskaldunen kasuan banderaria ikurriñarekin agertu zelarik bertako euskal jatorridunen ordezkari.