Hiriburu europarrak badu berriz ere euskal etxea: Bruselako Euskal Etxea ofizialdu zuen atzo Jaurlaritzak

2011/12/28

Bruselako Euskal Etxearen (BEE) logoa

PUBLIZITATEA

Zazpi urte pasatu dira Bruselak bere azkeneko euskal etxea ofizialki galdu zuenetik, Jaurlaritzako euskal etxeen erregistrotik erorita. Iazko udan, Julian Celayak, euskal etxe bat sortzeko eman beharreko pausoak azaldu zizkion Bruselako euskaldun talde bati, hirira egindako bisitan, eta azaroan oraingo ofizialtzean amaitu diren aurreneko urratsak eman zituen Bruselako Euskal Etxeak (BEE). Zorionak eta ongi etorri Bruselako lagunei!

Vitoria-Gasteiz. Eusko Jaurlaritzak, asteartero egiten duen Gobernu Kontseiluan, aztertu eta onartu egin zuen atzo Bruselako Euskal Etxea (BEE) euskal etxe gisa aitortzen duen erabakia, Euskal Autonomia Erkidegoaz kanpoko euskal gizatalde eta etxeekiko harremanei buruzko maiatzaren 27ko 8/1994 Legearen ondorioetarako.

Neurri honekin hiriburu europarrak berreskuratu egin du, izen ofizial honekin gainera, 'Bruselako Euskal Etxea', hiriko aurreko euskal elkartea, Txalaparta Bruselako Euskal Etxea izenekoa, ahultzen joan eta 2004an desagertu baitzen Jaurlaritzaren euskal etxeen erregistrorik.

EuskalKultura.com-ek duela bi aste eman zuen argitara orain ofizialdu den euskal etxearen ekintzen eta ezaugarrien berri ematen duen artikulua, hemen irakur daitekeena.

Bruselan, euskal etxeaz gain, Euskadiren Ordezkaritza ere badago, Eusko Jaurlaritzak erakunde gisa Europaren aurrean daukan ordezkaritza zuzen eta ofiziala, Marta Marin ordezkaritzaburu.

-Bruselako Euskal Etxearen (BEE) webgunea: www.bruselako.be
-Bruselako Euskal Etxea facebooken: www.facebook.com/bruselako