euskalkultura.eus

Pau, Frantzia. Elkarteko guraso talde batek sustatu zuen Olentzeroren harrera ekimena eta bertara bildu ziren 24 neska-mutikoen zorion aurpegiak ikusita arrakasta alimalekoa izan zela esan daiteke! Iragan abenduaren 17an Olentzerok lehen aldiz bisitatu zuen Lagunt eta Maita elkartea, egoitza berrian.

Aretoa Eguberritako apaindurez atonduta zegoen, zuhaitz eta guzti, eta haurrek jolasak eta eskulanak egin zituzten ikazkina noiz agertuko zain. Tarte horretan Laura 'andereñoak' Olentzeroren kondaira azaldu zien eta Pantxoa euskal gabon kantak irakasten aritu zen.

[Paueko Euskal Etxeko neska-mutikoetako batzuk eta 'andereñoa' Olentzeroren zain (argazkia PauEE)]

Eguneko unerik ederrena Olentzeroren etorrera izan zen. Andre Recalt izan zen Olentzero, eta "komediante aparta izanik", elkarteko iturrien esanetan, "ez zitzaion asko kosta paperean sartzea". Ez zitzaion ezer falta: bizar beltza, xamarra, abarkak, eta nola ez, opariz betetako zakua.

Elkarteko ume bakoitzari opari bat eramateko eskatu zitzaion eta gero opari horiek guztiak zakuan sartu eta banatu egin zituen Olentzerok. Umeak opariekin pozik bukatu zuten eguna eta baita gurasoak ere, euren seme-alabek euskal ohitura hau ezagutzeko eta gozatzeko aukera izan zutelako. Datorren urtean, zalantzarik gabe, gehiago!