euskalkultura.eus

euskal diaspora eta kultura

Albisteak rss

Urte berriaren omenez topa egin dute Argentinako euskal etxeetako kideek abenduko azken elkarretaratzeetan

2011/12/29

Paperetan idatzitako desioak sutan erre ziren,  errealitate bihurtuko direlakoan (argazkia EuskalKultura.com)
Paperetan idatzitako desioak sutan erre ziren, errealitate bihurtuko direlakoan (argazkia EuskalKultura.com)

PUBLIZITATEA

2011. urtea atzean geratuz doa. Momentu onak eta ez hain onak izan jadanik oroitzapen dira eta urte berria, orri zuri bat izango balitz bezala, esperientzia berriez beteko dugu egunez egun. Etorkizun hori ari dira ospatzen Argentinako hainbat euskal etxetako kideak egunotan euren kopak lagun artean altxatuz. Jai guztietan sentimendu handiko omenaldiak egin zaizkio euskaldunen lokarri den kultura eta sentimentuari. Esaterako Buenos Aireseko Iparraldeko Euskal Etxean, Rosarioko Zazpirak Baten, Mar Chiquitako Izatez Harron, Arrecifeseko Euskaldunak Denak Baten eta Trenque Lauquengo Euskal Sustraiaken. Hona euren urte amaierako elkarretaratzeen laburpena.

Buenos Aires, Argentina. Urteroko ohiturari jarraituz, Buenos Aireseko Iparraldeko Euskal Etxeak urte amaierako jaia ospatu zuen egoitzako kintxoan. Erakundeko Kultur Azpibatzordeko kideek antolatutako topaketan, pintxo eta bokatek osatutako menua zerbitzatu zitzaien gonbidatuei. Gabonetako oroigarriak zozketatu ziren eta afalostean, eta Olentzerorekin batera, sagarren erritua gauzatu zuten etxeko neskek. Urte berriari begirako desioak idatzi zituzten eta ondoren, paper guztiak sutan erre, laster errealitate bihurtuko direlakoan. Segidan, Euskal Herriko ikazkin maitagarriak gozokiak banatu zizkien bildutako lagunei. Euskal dantzak eta musika ordu txikiak arte luzatu ziren hiriburuko Moreno kaleko eraikuntzan.

Urte amaierako jaia Iparraldeko Euskal Etxean 2011 01

[Areto ondo apainduta eta sagardo gozoa lagun Iparraldeko Euskal Etxeko urte amaierako jaian, Olentzero ere partaide (argazkia EuskalKultura.com)]

“Ehun Urte Abertzaletasun”

Berezia baino bereziagoa iragartzen da 2012. urtea Rosarioko euskaldunentzat; izan ere erakundearen Mendeurrena ospatuko dute Zazpirak Bat euskal etxeko kideek datorren urtean eta ospakizunekin egoki hasteko nahian itxi zuten 2011 hau joan den abenduaren 18an.

“Euskal etxeko areto nagusia txikia suertatu zen bildutako jende kopuruarentzat. Bereziki aurten, inork ez zuen urtearen azken topaketa galdu nahi izan”, adierazi dute jaiko arduradunek. Eta aparteko errekiaz gozatzeaz gain, etxeko dantzarien emanaldia ere ikusi ahal izan zuten Rosarioko euskal etxera hurbildu zirenek.

Urte amaierako jaia Rosarion 2011 02

[Olentzero Rosarioko Zazpirak Bateko haurrak errezibitu zituen; bere opariekin zeharo harritu ziren etxeko txikiak (argazkia EE)]

Elkarretaratzearekin bukatzeko “helduengandik euskal ohiturak ikasten ari diren etxeko txikiak” zinez harritu ziren Olentzero ikustean. Ikazkinak opariak banatu zizkien aretoko agertokian. “Ehun Urte Abertzaletasun” lelopean, ekintza ugariko urtea hasiko dute rosariotarrek lau egun barru.

Arrecifeseko Euskaldunak Denak Bat

Arrecifeseko euskaldunak ere ari dira urteurren festa berezi bat prestatzen. Buenos Aires probintziako herri honetako euskal etxeak 90 urte bete berri ditu duela hilabete eta 2012an hori ospatzeko antolakuntzan murgilduta dabiltza euskal etxekoak. Bitartean, 2011ri 'agur' esan zioten Euskaldunak Denak Bat-eko kideek lagun arteko topaketa batekin. Jaian zehar, euren koreografiak aurkeztu zituzten etxeko dantzariek: txiki eta ertainek “Kontradantza”, “Fandango” eta “Gorulari”; Ugarritzak taldeko gazteek “Fandango” eta “Arin Arin”; eta Txiki Zaharrek “Fandango” eta “Lantzeko Inauteria”.

Urte amaierako jaia Arrecifesen 2011 03

[Antzezlanak eta euskal dantzak Euskaldunak Denak Bat-en urte azkeneko jaian (argazkia EE)]

Bere aldetik, 'Berria' izeneko euskara taldeak Argentinaratu ziren euskaldunei buruzko antzezlan bat egin zuten, abestiak eta guzti. Euskal etxeko argiak itzali aurretik, Maria Magdalena Boveda lehendakariak esker beroak eman zizkien guraso, ikasle, batzordekide eta oro har, lagun eta bazkide guztiei, otsaileko 25eko urtemugako jaian parte hartzeko gonbitea luzatuz.

Mar Chiquitako Izatez Harro

Jarduera handiko euskal etxe eskarmentudunek ez ezik, elkarte gazte direnek ere ospatu zuten urtearen bukaera eta berriaren hasiera. Mar Chiquita-ko euskal etxeko kideek, esaterako, arrazoi asko izan dituzte euren kopak altxatzeko. Bi urte baino ez ditu euskal etxeak eta epe honetan lan handia egin du herrialdeko euskaldunekin eta euskaldunentzat. Mutualitatea, hornitegia, komunitateari begirako heziketa-zerbitzua… hauek eta beste hainbat eskaintza heldu dira Mar Chiquitara euskal etxearen bidez. Horretaz gain, 2011an Eusko Jaurlaritzaren ofizialtasuna jaso zuen bere izenari ohore egiten dion Izatez Harro-k.

Urte amaierako jaia Mar Chiquitan 2011 04

[Mar Chiquitako euskaldunek urte amaiera eta erakundearen bigarren urtemuga ospatu zituzten (argazkia EE)]

Hori dela eta, abenduaren 10ean eta instituzioaren bigarren urtemugarekin batera, urte bukaera ospatu zuten Mar Chiquitakoek. Jaia “Momentos” izeneko jatetxe eta biltokian egin zen eta afari eta ikuskizun eder batez gozatu ahal izan ziren gonbidatuak.

Trenque Lauquengo Euskal Sustraiak

Euskal Sustraiak euskal etxean abenduaren 13an elkartu ziren erakundeko kide eta lagunak badoan urteari agur esateko. Afarian, elkarteak aurten bultzatutako ekintzei buruzko bideo bat proiektatu zen, tartean esaterako neguko barnetegia, urdaiazpiko jaia, Marita Echaveren liburuaren aurkezpena eta sanferminak. 

Urte amaierako jaia Trenque Lauquen 2011 05

[Trenque Lauquengo euskal etxeak lagunak eta ahaideak bildu zituen jaian (argazkia EE)]

Topa egiteko momentuan, Hector Echaide lehendakariak esker beroak eman zizkion bildutako jendeari eta Alejandra Bengochea etxeko idazkariak opari bana eskuratu zien herriko alkatea den Raul Feitori eta Jorge Zubillaga kideari. Herriko abeslari batek emanaldia eskaini zuen segidan.



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia