euskalkultura.eus

Caracas, Venezuela. Antolatzaileek gonbidatuta, Enrique Azurza (Tolosa, 1967) musikari eta koru zuzendari ospetsua egon da Caracasen, Venezuelako Ume eta Gazte Koru eta Orkestren Sistema Nazionalaren 50. urteurreneko ekitaldietan parte hartzeko. Musikari tolosarra bertakoak trebatzen ibili eta "Ahotsak: música coral contemporánea" (Ahotsak, koru musika garaikidea) ikuskizuna prestatu eta aurkeztu zuen Caracasen, 'Simón Bolívar' Koru Nazionalarekin eta 'Juan Bautista Plaza' Erregio Koruarekin. Kontzertuan formazio venezuelatarrek euskal musikagile ezagunen lanak interpretatu zituzten, tartean David Azurza, Xabier Sarasola, Francisco Madina eta Víctor Zubizarreta konpositoreenak.

Victor Zubizarretaren ‘Ama begira zazu’ ezaguna, Caracasen Enrique Azurza zuzendari

"Ahotsak: koru musika garaikidea” uztailaren 4an taularatu zuten Azurzak eta kantari venezuelarrek, Caracasko 'Centro Nacional de Acción Social por la Música' (Musikaren aldeko Gizarte Ekintza Zentro Nazionala) delakoaren Simón Bolívar aretoan. Aukera eta ospatzeko zio esanguratsua zen, eta publiko musikazale eta koruzale ugari bildu zen aretora nazioarte mailako ikuskizunaz gozatzera, tartean, ezin bestela, Eusko Etxeko eta euskal komunitate venezuelatarreko ordezkari eta melomanoak.

Topaketa 'Akelarren'

Caracasko Eusko Etxea eta bere bazkideak bertatik bertara ezagutzeko aukera ere izan zuen zuzendari tolosarrak, euskal venezuelarrek ekainaren 24an antolatu zioten harrera eta topaketan. EEko lehendakari Ibane Azpiritxagak egindako ongi etorri hitzetan, euskaldunentzat eta euskal diasporarentzat musikak daukan garrantzia azpimarratu zuen. Eusko Etxeko ‘Alaiak’ Koruak eta Venezuelako Psikologoen Elkartekoak kantatu zuten, euskal eta venezuelar kantutegiko zortzi abesti kantatu ere, Robert Inojosa maisua zuzendari.

Caracaseko Alaiak euskal abesbatza kantari, Azurza Eusko Etxean errezibitzen: 'Maitia nun zira' 

Enrique Azurza EEko Ibane Azpiritxaga lehendakariarekin (ezkerrean) eta Pedro Arriagarekin (eskuinean)

Topaketari amaiera emateko gonbidatu eta anfitrioiek mokadu eta edari batzuk partekatu zituzten Eusko Etxeak duela gutxi inauguratu zuen ‘Akelarre’ taberna berrian. Musikak bakarrik ekar dezakeen elkartasun giro dotore berezia arnastu zen ekitaldian. Azurzarekin batera Ronnie Morales ‘Simon Bolivar’ Kontserbatorioko zuzendaria, Ayari García Koru Nazionaleko gerentea eta Lourdes Sánchez Koru Nazionaleko zuzendaria ere partaide izan ziren, besteak beste, harrera ederrean.