euskalkultura.eus

Bogota, Kolonbia. Kolonbiako Euskal Astea erdibidean da jada, igandean hasi zenez geroztik, euskal kultura kolonbiarrei hurbiltzeko hainbat ekitaldi eskainiz. Jardun egitarau mardul horren barruan gaur euskal zinema saioa egingo dute Unibertsitate Nazionalean (Julio Medemen 'Euskal Pilota', 'Lucía y el sexo' eta 'Caótica Ana' ikusgai) eta Jose Antonio Urdiain tenoreak kontzertua eskainiko du Bogotako Arte Ederretako Antzokian. 

Ekitaldietan parte hartuz Eusko Jaurlaritzako ordezkaritza bat Bogotan da egunotan, Julian Celaya Kanpoko Euskal Herritar eta Gizataldeentzako zuzendaria buru delarik. Ordezkaritza horren parte da ere Jose Maria Gorroño Gernika-Lumoko alkatea. Izan ere, Euskal Astearen inaugurazioa herri horren izena duen lekuan egin dute: Bogotako Gernika parkean.

[Ezkerretik eskubira Julian Celaya, Euskal Herritar eta Gizataldeentzako zuzendaria; Jose Maríi Gorroño, Gernikako alkatea; eta Iñaki Martíiez, Euskadiko ordezkaria Kolonbian Gernika Parkearen kartelaren aurrean]

Inaugurazio koloretsua

2010eko Euskal Astearen inaugurazioa igandean egin zen eta bertan izan ziren Bogotako hainbat agintari eta Euskadiko ordezkaritza, euskal etxeko kide eta lagunekin batera. Francisco Abrisketa, Kolonbiako Euskal Etxeko presidentea, eta Iñaki Martinez, Euskadiko ordezkaria Kolonbian, izan ziren bertako buruzagitzan.

[Gernika Parkeko inaugurazio ekitaldiko une bat]

[Agintari eta ordezkariak komunikabideentzako argazkia ateratzen inaugurazio ekitaldian]

Jaialdia koloretsua eta bizia izan zen: dantza, musika eta gastronomia ekitaldiak, Munduko Umeak abesbatzaren kontzertua eta Euskal Etxeko Gazteen Athletic de Bilbao futbol taldearen partida bat egin zituzten, besteak beste.