euskalkultura.eus

Buenos Aires, Argentina. Buenos Aires Udalaren Puertas del Bicentenario (Bigarren Mendeurrenaren ateak) programaren gizataldeen omenezko ekimena den hau musika arloko proposamen batekin hasi zen atzo arratsaldeko ordu bi t'erdietan. Zubi urdin argia izeneko taldeak jo ondoren, Argentinako hiriburuan etorkinek izan duten eta gaur egun duten garrantzia nabarmentzen zuen bideo bat pantailaratu zuten antolatzaileek.

Dominen banaketarekin hasi baino lehen, Udaletxeko Bigarren Mendeurreneko ekintzen zuzendari den Carlos Ares-ek eta Erakunde Harremanetarako zuzendari den Claudio Avruj-ek hitz batzuk zuzendu zizkioten bildutako jendeari: 'Dominok garaikurrak ez direla azpimarratu nahi dugu; pertsona eta erakundeen lana, jarduera, zintzotasuna, duintasuna, ahalegina eta gizartean emandako ekarpena gailendu nahi ditugu', adierazi zuten omenaldiko arduradunek.

[Juan Bernardo Etchegoin, Euskal Echea-ko idazkari den Enrique Fagoagarekin atzoko ekitaldian (argazkia EuskalKultura.com)]

Hogei kolektibitatek jaso zuten atzo beren domina, tartean, eta euskal komunitatearekin batera, gizatalde alemaniarrak, arabiarrak, armeniarrak, britainiarrak, boliviarrak, txiletarrak, korearrak, kroaziarrak, esloveniarrak, espainiarrak, grekoak, hungariarrak, italiarrak, japoniarrak, judutarrak, libanoarrak, paraguaitarrak, perutarrak eta ukrainarrak.

Euskal Echea-ko Juan Bernardo Etchegoin lehendakariarekin batera, erakundeko beste hainbat agintari eta kideak ere bertaratu ziren Mayo Etorbidean dagoen eraikuntzara. Santiago Bonfanti-k, Enrique Fagoaga-k, Rodolfo Azcueta Roses-ek eta Graciela Aparicio-k lagundu zuten Etchegoin jauna zeremonia hunkigarri honetan.

[Saritutako gizatalde guztietako ordezkariak, Erakunde Harremanetarako zuzendari Claudio Avruj-ekin (argazkia EuskalKultura.com)]

“Herri honetan euskaldunok egin ditugun gauza guztiengatik eman digute gaur domina hau. XIX. mendetik hona euskaldunek Argentinako aurrerapen askoren protagonista izan gara, euskaldunak izan ziren gure ardien artzainak, euskaldunak izan dira lur argentinarra landatu zutenak; gure aberriaren aberastasun handiena euskaldunen eskutik etorri da”, esan zion atzo, domina jaso ondoren eta pozez beteta Juan Bernardo Etchegoin biarriztarrak EuskalKultura.com-i.