euskalkultura.eus

Noumea, Kaledonia Berria. Amicale du Pays Basque SONC elkarteak jai egun ederra izan zuen iragan larunbatean, uztailaren 6ean, eta uhartediko bazter guztietatik bildu ziren lagunak eta bazkideak hango giroaz gozatzera. Euskal Herritik heldutako gonbidatu bereziak ere izan ziren tarteko, horien artean Jean Louis Bergara eta berarekin etorri ziren musikariak (elkartearen jai egitarauan "Lau Eskualdunak" izenarekin agertzen zen taldea).

Bergarak EuskalKultura.com-i agertu dionez, jaiak giro bikaina izan zuen eta jendetza bildu zuen Noumeako frontoira. Han, palmera artean dagoen pilotaleku ederrean hasi zen eguna, xistera erakustaldi ikusgarri batekin. Ondoren, jaiko unerik hunkigarrienetako bat etorri zen, Alban Cointat lagunari irlako euskaldunek egin zioten omenaldia. 2011n hil zen Albanen omenez aurreskua dantzatu zuen irlako mutiko gazte batek eta kantuekin ere gogoratu zuten laguna elkarteko zenbait kidek.

[Eneko, irlako pilotari gazte bat xistera erakustaldian (argazkia AmicalePB)]

[Jean Louis Bergara eta Pierre Jaraygohen Alban Cointat-en omenaldian kantari (argazkia AmicalePB)]

Ondotik paella erraldoia jateko 700 lagun inguru bildu ziren eta arratsaldean irlako kantari eta taldeek kontzertua eskaini zituzten. "Hamabi musika talde aldizka pasatu ziren arratsaldean", azaldu du Bergarak. "Zinez egun oroitagarri bat!". 

 [Kaledonia Berriko dantzek ere tartea izan zuten elkartearen euskal jaian (argazkia AmicalePB)]

Argazki gehiago (seirehundik gora!) Amicale Pays Basque SONC elkartearen Facebook orrian.