euskalkultura.eus

Trois Pistoles, Quebec. Trois Pistoles herriko frontoiak bere 15. urtebetzea ospatu zuen iragan ekainaren hondarrean, ospatu ere Challenge France 2011 pilota txapelketa gauzatuz. Urtero egiten da lehiaketa hau, edizio bakoitzean leku diferente batean, eta bertara bildu ohi dira lurralde frankofonoetako pilota federazioen ordezkariak. Aurtengo lehia Kaledonia Berria eta Reunion bezalako lurraldeetan -Euskal Herritik milaka kilometrotara-- pilotak zaleak badituela ikusteko aukera bikaina izan da.

Txapelketa Trois Pistoleseko Parc de l'Aventure Basque en Amérique kulturgunean dagoen frontoian egin zen. Ekainaren 20ean hasi zen challenge hau eta larunbatean, ekainaren 25ean, bukatu zen, finalarekin eta sari banaketarekin. Ondotik itxiera ekitaldi berezia egin zuten bertaratu ziren ikusle eta jokalariei eskerraz emateko.

Finalean joko ikusgarria erakutsi zuten pilotariek, nahiz eta eguraldia kaxkarra izan. Provence-Alpes-Cote D'Azur taldeak Reunion irlako ordezkariak garaitu zituen, 35-32 markagailuarekin. Beste finalean Kanadako taldeak eskuratu zuen hirugarren postua, Saint-Pierre et Miqueloneko pilotariak mendean hartuz 35-16 markagailuarekin.

[Ikurrinak eta Quebeceko banderak leku berezia izan zuten frontoian (argazkia Pascale St-Amand)]

[Reunion irlako taldea -berdez- St. Pierre eta Miquelongo ordezkarien aurka (argazkia Pascale St-Amand)]

-Irudi gehiago, Parc de l'Aventure Basque en Amerique-ren Facebook orrian