euskalkultura.eus

Noumea, Kaledonia Berria. Munduan zehar San Ferminak ospatzen hasiko dira asteburuan Diasporako euskal etxeak, eta aurten jaia Pazifikoko uharteetaraino helduko da, Kaledonia Berriko "Amicale Pays Basque Sonc" elkarteari esker. Festa Noumea hiriburuko frontoian eta tabernan egingo da eta bertara bilduko dira inguru hauetako euskaldunak eta lagunak. Jaiak Alban Cointat omenduko du.

Eguneko egitaraua goizeko 10:30tan hasiko da, xistera erakustaldi batekin. Ondoren, eguerdian, festari musika jarriko dio "Lau Eskualdunak" taldeak (izen hori eman baitiote Jean Louis Bergara musikaria tarteko duen laukoari). Horrez gain herri kirol erakustaldiak eta euskal pastel lehiaketa egingo dira eta hiruetan musika eta dantza hasiko dira berriz, Malawi fanfarrearekin eta dantza brasildarrak egiten dituen talde baten erakustaldiarekin. 

[Kaledonia Berriko euskaldunek bihar egingo duten festaren afitxa]

Arratsaldeko lauetan bestalariak "Pakito Erraldoia" egiteko bilduko dira; "Pakito el Chocolatero" abestiarekin ahalik eta lagun gehien dantzan jartzen ahaleginduko dira, alegia. Bostetan artista gonbidatuen kontzertuak hasiko dira eta, bederatzietan, jaiari amaiera emateko "Lau Eskualdunak" igoko dira berriz ere taulagainera eta dantzaldia egingo da goizalderaino.