euskalkultura.eus

General Villegas, Argentina. Orain artean Buenos Aires probintziako herri askotara ekarri duen birarekin jarraitzen du Laura Nobile genealogistak. Izan ere FEVAren babesarekin 'Villegas’ko Euskaldunak' euskal etxea bisitatu zuen joan den ekainaren 25ean. Arratsaldeko 7etan eta euskal etxeko egoitzan, lagun anitzek arreta handiz entzun zuten genealogiaren arloan nola sartu eta ikertu azaltzen duen mintzaldia.

Ekainaren 27an, berriz, Saladillo herriko 'Itxaropen' euskal etxeak jaso zuen Nobileren bisita. Etxeko kide eta lagunak Mitre Liburutegiko Galliani Auditoriumean bildu ziren 'Seme-alabek ahaztu nahi dutena, bilobek gogoratu nahi dute' hitzaldia entzutera. Bi kasuetan, kolektibitate euskaldunak ez ezik, gainontzeko herritarrek ere hartu zuten parte ekintzan eta galdera mordoa egin zioten mintzalariari. Herrietako hedabideak ere hitzaldian izan eta aditua elkarrizketatu zuten.

[Saladillon Mitre Liburutegian aurkeztu zuen bere hitzaldia Laura Nobilek (argazkiaEE)]

“Jendeak, genealogiaren bidez, bere familiaren historia ezagutzea da hitzaldiaren asmoa. Eta uste dut zentzu horretan hitzaldia askoren jakin-mina pizten ari dela”, adierazi dio Nobilek EuskalKultura.com-i. “Gral. Villegas-en, esaterako, oso gauza bitxia eta polita ikusteko aukera izan dut: Euskal etxekoek prestatutako afariaren ondoren, 10 eta 12 urteko bi mutiko, hitzaldian entzundakoari jarraituz, internet-en miatzen hasi ziren eta euren aiton-amonen Argentinarako sarrera eta bataioaren informazioa aurkitu zuten”, kontatu digu harro genealogistak. “Alde batetik begi bistan uzten du hitzaldiaren eragina; eta bestetik, batez ere teknologia berriak gustuko ez dituztenei, erakusten die oso baliabide onak direla Internet-en daudenak informazioa eskuratzeko”, azaldu du Arrecifeseko euskal etxeko ordezkariak.

Hau eta beste 36 hitzaldi eska diezazkiokete Argentinako euskal etxeek, euskal elkarteak biltzen dituen FEVA federazioari. Eskabidea gauzatzeko prozedura xinplea da: 1.- Hizlaria eta hitzaldia hautatzea; 2.- Inguruko euskal etxeekin harremantzea, interes bera badute haiekin koordinatzeko hizlariaren etorrera datak; 3.- Eskabidea egitea FEVAri, lehenesten diren datak (bat baino gehiago) ipinita; 4.- FEVAk bitartekaritza lana egiten du hizlariarekin operazioa ixteko. FEVAk garraio gastuak bere gain hartuko ditu eta hizlariaren ostatua eta hitzaldiak eragin ditzakeen tokiko gainerako gastuei euskal etxeek egingo diete aurre.

-FEVAren webgunea: www.fevaonline.org.ar