euskalkultura.eus

Vitoria-Gasteiz. Eusko Jaurlaritzak argi berdea eman zion atzo asteartean eginiko Gobernu Batzordean bi euskal etxe berri onartzeari, biak Uruguain, nahiz eta ezaugarri desberdindunak izan. Lehenaren kasuan, San Jose departamentuko izen bereko hiriburuan lehenengo urratsak ematen ari den euskal elkarte gaztea da, San Joseko Euskal Etxea izenez munduratu berria dena.

Bigarren kasuan, aldiz, euskal etxe historikoa da berez Centro Euskaro euskal etxea, Montevideon egoitzaduna, 1911ean Centro Euskaro Español izenaz sortua eta duela urte batzuk bigarren epitetoa galdu zuena. Kasu honetan, erregistratuta egon zen Centro Euskaro, baina barne gora behera batzuk medio eta Montevideon zeuzkan egoitza handi eta zabalak galdurik, egoitza askoz apalago batera pasaturik bere nortasuna eta aktibitateak sekula ez galdu arren Jaurlaritzaren aurreko ofizialtasuna galdu eta orain berreskuratu duena, erakundearen mendeurrena ospatzeko urtearen atarian, Euskaroak 2011ko ekainaren 29an beteko baitu bere lehenengo mendea.

Bu euskal etxeon onespenarekin Uruguaik sendotu egiten du bere kokapena munduko euskal etxeen esparruan euskal etxerik gehien duen herrialde gisa Argentinaren eta Estatu Batuen ondotik.

Horrez gain behar da aipatu aspalditik datorkiola Uruguairi leku probilegiatua euskal Diasporaren historian, besteak beste bertan sortu baitzen 1876ko abenduan aro modernoko munduko euskal etxerik zaharrena, edo halakotzat daukaguna, Montevideoko Laurak Bat, gaur egun desagertua, Argentinako Buenos Airesen orainidk segitzen duen izen bereko euskal etxea sortu baino hilabete batzuk lehenago.