euskalkultura.eus

Hondarribia, Gipuzkoa. Guztira 56 taberna eta jatetxetako beste hainbeste sukaldari aritu dira egunotan lehian Euskal Herriko III. Pintxo Lehiaketaren sailkapen fasean. Sailkapen fase hau lau ataletan banatua izan da: Araba,  Bizkaia, Gipuzkoa eta Nafarroa. Iparraldeko sukaldariek ere lehiaketan parte hartzeko gonbitea jaso zuten, baina aurten ez da lehiakiderik aurkeztu. Lehiaketa joan den irailaren 29an hasi zen eta azken saioak urriaren 7 eta 8an egingo dituzte, Hondarribian. Irabazleak 3.000 euroko saria eskuratuko du, lehiaketa honek ematen duen ospe eta oihartzunaz gain. Bigarrenak 2.000 euro eskuratuko ditu eta hirugarrenak 1.000.

Horrezaz gain, partehartzaile guztien pintxoak liburu batean plazaratuko dituzte Kanela Argitaletxeak eta Hondarribiako Ostalari Elkarteak. Liburuak sukaldari bakoitzak eginiko lanaren argazkia eta errezeta jasoko ditu, eta baita ere pintxoa eskaintzen duen taberna eta jatetxearen helbidea. Liburua Durangoko Azokan aurkeztuko dute eta Euskal Herriko liburudendetan izango da salgai abenduan. Lehiaketan parte hartu duten jatetxeetan ere izango da eskuragarri. Liburua erreserbatu nahi izanez gero, Hondarribiako Ostalari elkartera idatzi: asociacionhosteleria@hondarribiaturismo.com.

Lehiaketaren antolatzaile nagusia Hondarribiako Ostalari Elkartea da eta babesa eskaintzen dute honako elkarteek: La Bacaladera, Marqués de Arienzo, Oreka Kaiku, Okin, Editorial Kaneta, Insalus, Caja Navarra-Civican, Gipuzkoako Ostalaritza Eskola CEBANC, Gamarrako Ostalaritza eta Turismo Eskola, Bizkaidendak, Grupo Noticias, Deia, Localia, Onda Cero, Durangoko Udala eta Hondarribiako Udala.

2007ko PINTXO IRABAZLEAREN ERREZETA: 'Txitxarro, ardi gazta eta mendafina gerezi kruxpetan' (barkatu, errezeta gazteleraz baizik ez baitator)

Lotura interesgarriak

Lehiaketari buruzko informazio gehiago
www.hondarribiaturismo.com