euskalkultura.eus

Mexiko DF, Mexiko. Gastronomian eta, bereziki, pintxoen prestakuntza eta dastaketan zaletuak diren lagunek euren sukaldaritza maila erakusteko aukera ederra eduki zuten iragan larunbatean Mexikoko Euskal Etxeak antolatutako lehen Pintxo Egunean. Zazpi aperitibo aurkeztu ziren orora, 'Nordiko' edo 'Boga Boga' bezalako izen orijinalekin. Lehiaketak lagun asko bildu zituen euskal etxera eta bertaratu zirenek jakiak dastatzeko auekra izan zuten. Halabaina, hiru adituek osatutako epaimahaia izan zen azken erabakia hartzeko ardura izan zuena.

[Epaimahaiak lehiaketako pintxo onenak aukeratu zituen]

[Goiko irudian, Trinidad de la Orden eta Mari Carmen Arrechea irabazleak txapeldunen txapelarekin]

Lehen postua Trinidad de la Ordenek eta Mari Carmen Arrecheak aurkeztutako 'Ipar-Sur' pintxoak irabazi zuen. Euskal eta andaluziar kultura nahasten zituen aperitiboa prestatu zuten. Salmorejo kremarekin busti zuten ogia eta gainean kalabazin irineztatua, gazta krema eta pipar gorria jarri zuten. Bigarren postua Arantxa eta Miguel Larreguiren 'Hogazita' pintxoarentzat izan zen. San Juango onddoz osatutako kukumarroa aurkeztu zuten.

[Mexikoko Euskal Etxeak antolatutako lehen 'Pintxo Eguna' lehiaketan parte hartutako bikote bat pintxoa prestatzen]

Lehiaketako hirugarren sailkatua Jorge Roblesek eta Luis Miguel Zugarramurdik osatutako bikotea izan zen. 'Fusion' pintxoa zen beraien proposamena eta honako osagaiak zituen: ogiaren gainean arrain-xerra, olio-ozpina izkirarekin, eta mango saltsa. Jarduera ostean, partaideek musika eta dantzekin gozatu ahal izan zuten gauerdia baino beranduago arte.

[Lehiaketa ostean, dantzatzeko momentua iritsi zen (argazki multzoa Mexikoko Euskal Etxea)]

Lotura interesgarriak

Mexikoko Euskal Etxea
www.centrovascomexico.com

Vascosmexico
www.vascosmexico.com