euskalkultura.eus

Rosario, Argentina. Nazioarteko Pilota Federazioak, Argentinako Pilota Federazioak eta Rosarioko Nafar Etxeak bultzatuta, 22 urte azpikoen VII. Munduko Pilota Txapelketa urriaren 11tik 19ra izango da. Argentina, Txile, Bolivia, Ekuador, Estatu Batuak, Espainia, Frantzia, Mexiko, Peru, Dominikar Errepublika, Uruguai eta Venezuelako jokalariek hartuko dute parte. Hiru modalitatetan jokatuko dute pilotariek:  eskuz banaka eta eskuz binaka, larruzko paleta eta pala motzean, horretarako prestatutako 36 metroko frontoian.

Ekimen hau Rosarioko Nafar Etxeak azken urteotan egin duen ekitaldi nagusienetakoa da eta denbora daramate berau prestatuz. Nafar Etxeko frontoia Rosariotik gertu dagoen Funes herrian dago eta elkartearentzat luzaz izandako ametsa da mundiala hona ekartzea. Lehenengo aukera orain dela bi urte etorri zen, 2006ko irailearen 26an, Mexikon egin zen Nazioarteko Pilota Federazioko biltzarrean Argentina Txapelketako egoitza izateko izendatu zutenean. Argentinako Federazioak Rosarioko Nafar Etxea aukeratu zuen Funeseko “Nafarroako Erresuma” frontoian mundiala antolatzeko. 2005ko azaroan inauguratu zuten 36 metroko frontoi hau. 

Txapelketa hau Rosarion egin ahal izateko akordioa sinatzeko ekitaldira honakoak bertaratu ziren: Nazioarteko Euskal Pilota Federazioko diruzaina, Angel Arraiza; Argentinako Federazioko presidentea, Juan Carlos Trigo; Rosarioko Nafar Etxeko titularra, Fernando Latasa Blanco; eta Sandalio Monreal, etxe honetako lehendakari ohia eta txapelketaren bultzaile nagusia.

Funes herria, Rosariotik 15 kilometrora dago kokatua, Santa Fe probintziako hegoaldean.

Lotura interesgarriak

Rosario Nafar Etxearen webgunea
hemen.