euskalkultura.eus

Corpus Crihsti, Argentina. "Ekitaldiaren helburua eskola, guarani herriari ematea zen. Eskola hau amets nagusienetako bat da diskriminazio eta pobrezia gordina sufritzen duen herri honentzat", esan zuten Euskal Etxetik. "Izan ere, badakite hezkuntzaren bitartez aurrera egin ahal izango dutela eta bertako irakasleak trebatuz euren kultura mantendu ahal izango dutela, batez ere euren ama-hizkuntza".

Ekitaldia hiru hizkuntzatan egin zen: guaraniz, gaztelaniaz eta euskaraz. Mbyá Guaraní komunitatearen buru ("cacique" esaten diote) Germán Acostak, eskerrak eman zituen eta bertan bildutakoei komunitatearen bizi baldintzak ikusteko eta kultura ezagutzeko gonbitea egin zien, lehendabizi guaraniz eta ondoren gaztelaniaz. 

[Hiru bandera izan ziren ekitaldian: argentinarra, bertako herriena eta ikurriña. Iruditan eskolako ikasle batek herri indigenen bandera dakar, harro, eskolako bata estrainekoz soinean (argazkia CorpusChristiEE)]

Hizkuntza eta biziraupena

Euskal Etxeko Carlos Leyríasek ekimena nola sortu eta garatu zen azaldu zuen. Ondoren, Olga Leiciaga presidenteak eraikina eman zion ofizialki Tavá Mirí herriko komunitateari eta Iñaki Galdosek eta Germán Acostak plaka oroigarri bat desestali zuten. Roxana Duarte irakasleak eta Aída Giménez euskal etxeko kideak moztu zuten zinta.

Ondoren Iñaki Galdosek eskerrak eman ziezkien euskal etxeko kideei, elkarteak, eta euskal etxeek orohar, egiten duten lana goraipatuz. Galdosek bereziki azpimarratu zuen lan hau ez dela mugatzen euskal kultura zabaltzera, baizik eta euskaldunek euren inguruan bizi direnei laguntzeko ahalegin handia ere egiten dutela. Galdos nortasuna gordetzearen garrantziaz mintzatu zen eta guarani herria bere hizkuntza mantentzeagatik zoriondu zuen. Hizkuntza gordetzearen garrantzia nabarmendu zuen, "hizkuntza galtzen bada, herria galtzen" dela esanez.

  [German Acosta eta Iñaki Galdos eskolan plaka oroigarria desestaltzen (argazkia CorpusChristiEE)]

Haritza eta palmondoa

Eskolaren eraikina bedeinkatu ondoren, haurrek kanta guaraniak abestu zituzten. Ondoren, eskolatik gertu, bi zuhaitz landatu zituzten Carmen Miranda de Ballesteros eta Gladys Ferragut de Markiewicz bazkideek: haritz bat eta palmondo bat. Euskal eta misionestar kulturaren irudi dira bi zuhaitzok eta "askatasunaren, bakearen eta berdintasunaren ikur" bezala haziko dira eskolan, euskal etxeko arduradunek azaldu zutenez. 

[Eskola inaugurazio ekitaldirako atondu zuten (argazkia CorpusChristiEE)]

Gipuzkoako Aldundiaren laguntza ekonomikoa eskertzeko, German Acosta kazikeak guarani artisauek eginiko termo bat eta mate bat oparitu zizkion Iñaki Galdosi. Paranako Urrundik Euskal Etxeak, aldiz, Parana ibaiaren argazki bat eman zion eta ohorezko gonbidatu izendatu zuen, Aldundiaren laguntzari esker guarani haur hauen ametsa bete ahal izan dutela azalduz.