euskalkultura.eus

Corpus Christi, Argentina. Corpus Christiko Euskal Etxeak urtetik urtera bazkide kopurua gehitu egin du, 2005ean sortu zenez geroztik, eta gaur egun une bikaina bizi du, hiriko gizartean eta bizitzan parte hartze handia duelarik. 2008an zehar, adibidez, elkarteak hamaika ekitaldi burutu ditu, besteak beste, Mbya Guarani komunitateari bisitak, Aberri Eguna, Euskararen Eguna, San Inazioren ohorezko jaiak... Elkarteko presidentak, Olga Leiciagak, ekimen hauen argazkiak bidali dizkigu: 

[Corpus Christiko Euskal Etxeak Mbya Guarani komunitateari egin zion bisitan Ana Maria Macci Hilario Reyes kazike ohiaren familiarekin bildu zen (argazkia Corpus Christi EE)]

[Mbya Guarani komunitateko eskolako haurrak Corpus Christiko Euskal Etxeko lagunekin (argazkia Corpus Christi EE)]

[Corpus Christiko Euskal Etxeak euskal jatorria duen Jean Cormier Eyheragibel zinemagilearen bisita jaso zuen. Harrera afaria egin zioten Marichu Larumberen etxean, Posadasen (argazkia Corpus Christi EE)]

[Maria Isabel Azpillaga euskal parlamentaria Argentinan izan zen eta Corpus Christira egin zuen bisitan hitzaldia eman zuen Euskal Etxean (argazkia Corpus Christi EE)]



[Corpus Christiko Euskal Etxeak Aberri Eguna ospatu zuen urtero legez. Iruditan elkarteko hainbat kide (Ivanna Galeano, Aylin Vera eta Giselle Cabañas) elkarteak egin zuen bazkarira heltzen (argazkia Corpus Christi EE)]

[Gitarra joaz Eneko Landaburuk Aberri Eguneko bazkalostea animatu egin zuen eta bertaratu ziren kideek Iparragirreren 'Gernikako Arbola' klasikoa kantatu zuten (argazkia Corpus Christi EE)]



[Corpus Christiko Euskal Etxeak San Inazio eguna hainbat ekimenekin ospatu zuen: alde batetik, Yeray Aguila Barrenengoa euskara irakasleak hitzaldi bat eman zuen (irudian) eta bestetik Cesar Arrondo irakasleak 'San Inazio Loiolakoa, euskal santu bat' gaia jorratu zuen San Inazio Parrokian eman zuen solasaldian, uztailaren 26ean (argazkia Corpus Christi EE)]



[Corpus Christiko Euskal Etxeak Bilkura Orokorra egin zuen azaroaren 16ean eta ondoren elkarteko kideek lagunarteko bazkaria egin zuten (argazkia Corpus Christi EE)]



[Euskararen Eguna ere ospatu zuen Corpus Christiko Euskal Etxeak, Leyras familiak Teyu Cuare-n (San Ignacio) duen 'chacra'-n egin zen jaiarekin. Pedro Guridi bazkideak hitzaldi bat eman zuen eta ondoren lagunarteko bazkaria egin zuten bertaratu zirenek (argazkia Corpus ChristiEE)]

Irudi gehiago gure Argazki Galerian, hemen.