euskalkultura.eus

Corpus Christi, Argentina. Corpusko Eusko Etxea-tik, elkarteko lehendakariak, Olga Leiciagak, bere poza adierazi dio EuskalKultura.com-i, bertako euskaldunen izenean, posible izan baitute "mbya-guarani komunitateentzako egindako eskola eraikitzeari dagokionez". Proiektua Gipuzkoako Foru Aldundiaren sostenguari esker bururatu ahal izan dute, eta kari horretara iritsiko da gaur eguerdiz Corpusera, gonbidatu gisa, Iñaki Galdos Gipuzkoako Foru Aldundiko Kanpo Ekintza eta Kirol diputatua.

Euskal etxe antolatzailetik, gonbidapena lagun guztiei luzatu nahi izan diete, "bertako jatorrizko herrien hezkuntza, osasun eta kultur alorreko garapena bultzatzeko engaiamendua lokarri, 44 zenbakidun Eskolari dagokion satelite bidezko ikasgelaren hezkuntz-komunitatearen eta Eusko Etxearen elkarrekiko lanaren poza partekatu nahi duten guztiei". "Gure lagunetako batzuk fisikoki parte hartu ahal izango dute, eta beste batzuk espiritualki", azaldu du Leiceagak. "Guztiei gure gonbidapena eta gure hurbiltasuna".

Egitaraua

Ekitaldia "xinplea baina sentitua" izango dela iragarri dute, eta arratsaldeko lauretatik aurrera gauzatuko da eskolaren eraikinean bertan, 'Camino al Puerto Viejo' helbidean. Aurretik bazkari bat egingo da San Ignacio-ko Club del Rio-n, eta bertan Eusko Etxeak koadro bat emango dio Iñaki Galdosi, 'Ohorezko bisitari' gisa izendaturik. Egitaraua, 16:00etatik aurrera hauxe izango da:

-Ongietorria jatorrizko hizkuntzetan, guaraniz eta euskaraz, hain zuzen; eta gaztelaniaz

-Hiru bandera bertan: argentinarra, jatorrizko herriena eta ikurrina

-Eusko Etxeko ordezkari baten hitzak

-Plaka bat desestaliko du Eusko Etxeak

-Zerrenda-mozketa. Eskolan sartzea

-Musika eta kantu guaraniak, komunitateko haurren eskutik

-Bi arbola andatuko dira, esanguratsuak Euskal Herrikoentzat eta Misioetakoentzat: haritza eta palmera pindó

-Opari bat (eskuz egindakoa) emango dio Tavá Mirí hezkuntz-komunitateak gipuzkoar diputatuari

[Ekitaldi honen ondotik, Eskolak, epe laburrean, beste inaugurazio bat egingo du, Hezkuntza Ministerioak finkatutako araien arabera]

Iñaki Galdos Argentinan bisitari

Azkeneko asteko hondarreko egunetan heldu da Argentinara Gipuzkoako Foru Aldundiko Kanpo Ekintza eta Kirol diputatu Iñaki Galdos. Kirol arloko diputatu den aldetik --eta realzale amorratua gainera--, Galdosek onartu egin zuen Argentinako Realaren Peñatik egin zioten bestelako gonbidapen bat, izan ere Reala eta Bartzelona futbol taldeak joan den larunbatean Anoetan jokatu zuten partida La Platako euskal jatetxe baten bildutako peñako kideekin internetez ikusteko. 2-1 irabazi zuen Realak, eta egoki ospatu zuten.