euskalkultura.eus

Necochea, Argentina. Adin guztietako lagunek, baina batez ere neska-mutilek osatutako talde polit bat ibili zen pasa den apirilaren 23an Necocheako erdiguneko kaleetatik. Abestuz, dantzatuz, eta Korrikaren 17. edizioaren petoak jantzita, bertako Euzko Etxea-ko kideek erakutsi diote komunitateari Necochean ere maitatu, ikasi eta aritzen dela euskaraz.

[Necochea-ko Korrikalariak Euzko Etxea-ko atarian (argazkia EE)]

Proposatutako bidea egin ondoren, euskal etxeko egoitzaren aurrean bildu ziren korrikalariak lekukoaren barruan zegoen mezua irakurtzeko.

[Necochea-ko Korrikaren 17. edizioaren bideoa]

Aberri Eguna eta Gernikako Bonbardaketa

Garrantzi handiko beste bi data gertatu dira azken egun hauetan Euskal Herrian. Euskal Aste Nazionala antolatuko duen euskal etxean ere egin zen ekitaldi berezi bat Aberri Eguna eta Gernikako Bonbardaketa oroitzeko.

[Aberri Eguna eta Gernikako Bonbardaketaren urtemuga ospatu ziren Necochean Pazko Igandean]

Dardo Rocha plazan eta Argentinako bandera eta ikurrinaren aurrean ohorezko Aurreskua dantzatu zuten Euzko Etxea-ko dantzariek, txistuaren laguntzaz. Ondoren, hitz batzuk zuzendu zitzaizkion bildutako jendeari, eta lore sorta bat utzi zen haritzaren kimuaren oinarrian. Euskaldunentzat hain esanguratsuak diren bi efemeride hauen zeremonia bukatzeko, “Gernikako Arbola” abestu zuten gonbidatuek aho batez.