euskalkultura.eus

Olavarria, Argentina. Elvira Kortajarena ordezkaria Olavarrian izan zen iragan maiatzaren 10ean, Gure Etxe Maitea euskal etxea ezagutzeko. Ordezkariari harrera egin zioten elkarteko presidenteak, Maria Susana Mendizabalek, eta Hilda Eyherabide diruzainak. Elkarrekin hirian zehar ibilbide turistikoa egin zuten eta ondoren euskal etxearen egoitzan bertako euskal komunitatearekin bildu ziren.

Euskal Etxearen egoitzan Kortajarenak prentsaurrekoa eskaini zuen hiriko Diario El Popular egunkaria eta zenbait irrati bertan zirela, besteak beste. Ondoren elkarteko bazkideekin bildu zen eta beraiekin solas egin zuen Euskadiren lotutako hainbat gairi buruz: turismoa, enpresa garapena, industria, kultura, euskara eta datorren igandean gauzatuko diren euskal udal hauteskundeak tartean. Kortajarenak, bere aldetik, jakinmina agertu zuen Olavarriako euskal elkartearen egoera, ekimen eta arazoei buruz.

[Elvira Cortajarena Gure Etxe Maitea-ko hainbat kidek inguratuta. Eserita dauden lau emakumeak, María Ester Arrondo, Elvira Cortajarena, Marisu Mendizabal eta Hilda Eyherabide dira (EArrondo argazkia)]

Jaurlaritzaren ordezkariak zorionak eman zizkien Olavarriako Euskal Etxea bere azken etapa honetan aurrera ateratzen ari diren eragileei, bereziki Maria Susana Mendizabal lehendakariari eta bere Zuzendaritza Batzordekoei, elkartea batere ekintzarik gabe eta ia desagertuta hartuy baitzuten eta apenas urtebete-urte t'erdian goititu eta biziberritu egin baitute, elkartearentzat berea zen eraikina berreskuratuz eta aurretik zeraman ekimen ildoari eutsiz.

Azkenik, euskal etxeko kideek ohorezko afari bat eskaini zioten Kortajarenari, eta elkarteko ureezko liburuan sinatu zuen. Ekitaldiotan, Lapridako Euskal Etxetik heldutako bi ordezkarik ere hartu zuten parte: Elsa Eyherabidek eta Eusko Txokoa Liburutegiko arduradun den Maria Ester Arrondok.