euskalkultura.eus

Cnel Pringles, Argentina. Immigrantearen Eguneko ospakizunaren baitan, ekintza berezi bat egin zuen Buenos Aireseko Coronel Pringles hiriak bertan bizi diren kolektibitateak omentze aldera. Hamar gizataldek hartu zuten parte zeremonian, tartean gizatalde belgikar, txiletar, espainiar, frantses, italiar, israeldar, siriar-libanoar, suitzar, Volgako alemaniar eta euskaldunak. 2013 honetan 34. ediziora iritsi den festa Udal Interesekoa izan da izendatua eta bi zatitan burutuko da. Alde batetik, irailaren 4an ekintza nagusia gauzatu zen Immigrantearen Omenezko Monumentuaren aurrean; bestetik, datorren larunbatean Immigrantearen Kantina izeneko ekitaldia burutuko da eta bertan musika eta dantza ikuskizunak eta plater tipikoak eskainiko dira. Jaiari amaiera emateko, Immigranteen Erregina hautatuko da Kantinaren Egunean.

Pasa den astean egindako omenaldiari dagokionez, Argentinako Ereserkiarekin hasi zen zeremonia. Publikoak abesten zuen bitartean, Carlos Oreste alkateak eta gizataldeetako ordezkariek euren herrietako banderak jaso zituzten. Ereserkia abestu ondoren, lore eskaintza utzi zen Monumentuaren oinarrian.

[Coronel Pringleseko Eusko Biltzar Euskal Etxearen izenean, erakundeko lehendakari Juan Jose Olasagastiak izan zuen bandera igotzeko ohorea (argazkia Pringlesentretodos)]

Zeremoniarekin jarraitzeko, Immigranteen Erregina izateko lehiatuko diren hautagaiak aurkeztu ziren. Coronel Pringleseko euskal etxearen ordezkaria Juliana A. Mandrini gaztea da eta beste neskekin batera jantzi tradizionalez jantzita agertu zen publikoaren aurrean.

[2013ko Immigrantearen Eguneko ekintza nagusian, eta bakearen ikur moduan, zenbait uso utzi ziren aske (argazkia Pringlesentretodos)]

Bukatzeko, eta bertako ‘El Orden’ egunkariak ongi azaltzen duenez ‘elkartasuna, bakea eta senidetasuna adierazteko’ uso askatzea egin zen. Usoak aske utzi ondoren kabalkadan joan ziren lagun guztiak monumentutik Arteen Kooperatibara bertan egin zen harreran parte hartzera. Carlos Oreste alkatearekin batera, beste hainbat agintari bildu ziren zeremoniara. Horien artean, Udalbatzako presidente Marisol Ochoa, bloke ezberdinetako politikariak, Club Rotario Elkarteko agintariak eta Abel Vitalus apaiza.