euskalkultura.eus

Coronel Moldes, Argentina. Diasporako euskal etxe askotan ospatzen da San Inazio eguna eta Coronel Moldes herriko euskal etxeak ere ospatu du aurten lehendabizikoz. Oraindik egoitzarik ez dutenez, Gure Zainak-eko kide eta lagunak “Las Brasas” jatetxean elkartu ziren Gipuzkoa eta Bizkaiko patroiari omenaldia egite aldera.

Arrakastatsua izan da bazkaria. Izan ere, laurogei inguru lagunek hartu zuten parte. Bilera aprobetxatuz, euskal etxeko idazkaria den Maria Cecilia Aguirrek hitza hartu zuen euskal etxean garatzen ari diren ekintzak eta Maria Esther Alzuri, Nestor Aguirre eta Roberto Urruchuak egindako lana azpimarratzeko.

[Liburuaren aurkezpenean euskal etxeko lagunak, haiek entzundako sukaldaritzari buruzko istorioak kontatzera animatu ziren]

Testu-inguru honetan, Marita Echavek bere 'Euskal baserrietako sukaldaritza' aurkeztu zuen. “Euskal baserrietako sukaldaritza? Nondik atera da sukaldaritza hau? Gure zelai etxeetako sutondoetatik. Bapo-bapo eginda eta indarrez beteta uzten gaituzten plater horien errezetak agertzen dira testuan”, adierazten da liburuaren kontraazalean. Aurkezpenean, bildutako jendea animatu zen haiek ere ezagutzen zituzten pasadizo eta istorioak kontatzera. 'Euskal baserrietako sukaldaritza' liburua Cordoba hirian ere aurkeztuko da abuztuaren 19an, iluntzeko 8etan, “Restobar 31” tabernan.

[Marita Echavek idatzitako 'Euskal baserrietako sukaldaritza' liburuaren aleak]

Bukatzeko, Coronel Moldesko euskaldunek jakinarazten dute asteartero goizeko 11etan eta Anahí Arburuak gonbidaturik, Marita Echavek eta Roberto Urruchúak “Euskal Unea” izeneko programa egiten dutela “Buenas Ondas” irratian. Saioan, Euskal Herriari buruzko arlo askotako informazioa zabaltzen da. Etorkizunari begira, datorren irailean herriko urtemugaren ospakizunetan ere egongo dira euskaldunak. Alde batetik, Mikel Ezkerrok “Euskal Sustraiak” delako hitzaldia emango du; beste alde batetik, Cordoba hiriburuko “Baietz” taldeko mutilek kantaldi eta musika tailerra eskainiko dute.