euskalkultura.eus

Pergamino, Argentina. Pergaminoko Irakasleen Prestakuntzarako 122 zenbakidun Goiko Institutuko Historia bi ikasle euskal kulturan murgildu ziren urteko lehenengo lauhileko ikastaroari zegozkion ikerlanak egiteko. Ikas prozesuan, Lagun Onak Euskal Etxeko kideen laguntza jaso zuten Andrés Angel Mengascini eta Diego Canulli ikasleek, eta lana bukatuan haiek ateratako ondorioak eta emaitzak aurkeztu zituzten hiriko Colon Etorbidean dagoen Institutuan.

Mengasciniren azterlanari dagokionez, “Euskaldunen kokapena Pergaminoko landa-eskualdean” izeneko idatziak gizarte, ekonomia eta kulturaren arloan Euskal Herriko immigranteek izan zuten eragina deskribatzen du. Errolda ofizialetan, prentsan, elizako txostenetan, euskal etxeko kide helduenei egindako elkarrizketan eta Lagun Onak-eko liburutegian dagoen dokumentazioan daude oinarrituta datuak.

Canulliren azterlanaren kasuan, berriz, kirola izan da gai orokorra; zehatz mehatz, “Euskal pilota Pergaminon” du izenburu tesiak. Lanaren hasieran, Canullik Pirinioetako kirol honen mota ezberdinak azaltzen ditu eta ondoren Pergaminon nola heldu eta garatu zen.

“Historia Institutuko ikasle hauek egindako azterlanak euskal etxeko liburutegian ikusgai egongo dira” azaldu diote euskal etxeko arduradunek EuskalKultura.com-i. “Udaletexeko liburutegian, Buenos Aires probintziako Ipar-mendebaldeko Unibertsitatean, Irakasleen Prestakuntzarako Goiko Institutuan eta eskoletan ere banatuko ditugu beste kopia batzuk. Guretzat oso ekintza garrantzitsua izan da eta ezagutzera eman nahi dugu”, adiera digute Lagun Onak-eko kideek.