euskalkultura.eus

Bahia Blanca, Argentina. “Eskualde mailako topaketa egiteko ideia iaz sortu zen”, azaldu dio Romina Larrañaga dantza taldeko zuzendariak EuskalKultura.com-i. “Jakina denez, urtero antolatzen da ume topaketa bat Euskal Echea Institutuko Llavallol-go egoitzan, baina distantzia dela eta oso zaila egiten zaigu guri eta hemendik hurbil dauden euskal etxeetako kideei hara joatea. Horregatik pentsatu genuen hemen zerbait antzekoa antolatzea. Badakigu askoz txikiagoa dela gure proposamena, baina asmoa da umeek elkar ezagutzea eta batez ere ondo pasatzea”, adierazi du Larrañagak.

Iaz egin zuten lehengo topaketa, eta arrakastatsua suertatu zenez –Bahia Blancakoez gain Macachingo Euskal Etxeko 30 umek hartu zuten parte– aurten gonbite zabalagoa egin dute Union Vasca-ko kideek. Eta baita erantzun ezin hobea jaso ere: Macachin, Laprida eta Coronel Pringles-ko euskal etxeko txikiak bertara bilduko dira ekainaren 26an. Hona egitaraua.

Egun osoko egitaraua:

- Goizeko 10:30etan: umeen harrera.
- Goizeko 11:00etan: taldeko jolasak. Liburutegi eta euskararen standa, liburuak eta jostailu elkarreragileak.
- Eguerdiko ordu 1ean: bazkaria: pizza. Beti Aurrera taldea antolatzaile.
- Arratsaldeko ordu 2:30etan: herriko kirolen antzeko Jolasak.
- Arratsaldeko 4:30etan: askaria. Txokolatea eta uztaiak (San Juan eguneko umeen ohiko askaria).
- Arratsaldeko 5:30etan: ipuin interaktiboa “Sorginen historia”. Power point baten aurkezpena Metxi del Santoren esku.
- Arratsaldeko 6etan: bedeinkapena eta suaren hasiera. San Juan egunari buruzko azalpena eta abestiak, euskal etxeko euskara irakasle eta ikasleen ardurapean.
- Arratsaldeko 6:30etan: sorginen erretzearekin eta suaren inguruko dantzekin bukatuko da jaia. Etxeko txistulariek musika jarriko dute.
- Arratsaldeko 7etan: txistorrak, babarrunak eta edariak. Etxera bueltatu aurretik, lagunen arteko afaria.