euskalkultura.eus

Idiazabal, Argentina. Ezohiko asteburua bizi izan dute idiazabaldarrek joan den irailaren 11 eta 12an. Herriaren mendeurrena dela eta, hamaika ekintzak gauzatu zituzten herri osoa partaide.

Egitarauari erreparatuz, larunbat goizean, Sarmiento Plazan, Argentinako bandera igo eta ehun salva bota ziren. Ondoren mendeurrenaren monumentua inauguratu zen, lore sortak jarriz eta plaka berri bat desestaliz. Goizeko 10etan, esker-emate elizkizunaren txanda etorri zen.

[Mendeurreneko txapela]

Arratsaldean, kabalkada egin zen eta Ordoñez herriko Bandak jo zuen. Jarraitzeko, Sarmiento Plazan bertan, ekitaldi ofiziala bukatu ostean, herriko balio anitzeko areto eta polikiroldegi berriak inauguratu zituzten, zegokion zerrenda moztearekin. Larunbata afari herrikoi batekin bukatu zen. Bi mila eta ehun bat lagun bertaratu ziren Idiazabalera afarian egoteko. “Guztion helburuak gainditu zituen topaketak, herriak 1700 biztanle baino ez baitu”, azaldu dio Marta Montivero idiazabaldarrak EuskalKultura.com-i.

[Urtemuga berezi hau ospatzeko, pastel erraldoia prestatu zeta paseatu zuten idiazabaltarrek]

Igandean, berriz, San Demetrio patroiaren omenezko meza amaitu eta gero, Argentinako eta Euskal Herriko bi herrion arteko senidetzearen berritzea sinatu zuten bertako Eliberto Favalli alkateak eta Euskal Herritik propio etorrikako Ioritz Imaz Baztarrika Goierriko Idiazabalgo alkateak eta Kepa Oiarbide zinegotziak monumentu aurrean. “Senidetzearen bidez, diru-laguntza jasotzen dugu guk urtero eta diru horrekin taller teknologikoak martxan jarri ditugu”, dio Montiverok. “Tailerretan soja-irina eta milanesak egiten dituzte eskoletako neska-mutilek eta esan behar dugu gure produktuak oso harrera ona dituztela Argentinako baita kanpoko merkatuetan ere”.

[Goierritarrek "asado" tipiko bat partekatu zuten anfitrioiekin]

Urtemugaren ospakizunei amaiera emateko, Cordoba hiriko Baietz musika taldeak jo zuen balio anitzeko aretoan. Ekitaldi ofizialetan parte hartzeaz gain, euskaldunek Uranga estancia bisitatu eta gai askotako erakusketak ikusi ahal izan zituzten.

Lotura interesgarriak

Argentinako Idiazabal Fundazioa
www.fundacionidiazabal.com.ar