Antzar Eguna, Valenciara txangoa eta Eusko Etxea-ko bi lagunen gomuta, Caracaseko Jazoera buletinean

2012/09/21

Eusko Etxea-ko lagun talde honek Valenciara bidaia egin zuen Caraboboko euskal elkartearen Begoñako Ama Birjinaren jaian parte hartzeko (argazkia Jazoera)

PUBLIZITATEA

Caracaseko Eusko Etxeak Jazoera albistari digitalaren azken alea argitaratu du --hemezortzigarrena-- eta azken asteetan Caracasko eta Valencia-Caraboboko elkarteetan egin diren ekimenak bildu ditu bertara. Horien artean aipagarria da Eusko Etxean egin zen San Antolin eguneko jaia --azken urteetan utzita zegoen Antzarren Jokoa berreskuratuz-- edo Valenciako Begoñako Ama Birjinaren jaia. Horrez gain, buletinak berriki hil diren komunitateko bi kideri --Guillermo Ramos eta Alatz Mugica-- agur egiten die eurei buruzko artikuluekin.

Caracas, Venezuela. Azken Jazoera pare bat eguneko atzerapenarekin argitaratu du Caracasko Eusko Etxeak, baina, Pedro Javier Arriaga editoreak azaltzen duenez, merezi zuen itxaroteak, horrela San Antolin eguneko kronika ere sartu delako edizio honetan. Iragan irailaren 15ean egin zen festa eta ohi bezala giroa bikaina izan zen, batez ere Antzar Jokoa berreskuratu duelako elkarteak (EuskalKultura.com-ek horren berri eman zuen aurreko artikulu batean). Elkarteko presidenteak, Pedro Arriaga Aguirrek, zuzendaritzaren balioespena oso baikorra dela dio, besteak beste hirugarren eta laugarren belaunaldiko gazte gero eta gehiago hasi direlako ekitaldietan parte hartzen.

Buletinean aipatzen den beste ekitaldi bat Valenciako Eusko Etxearen Begoñako Ama Birjinaren jaia izan zen. Elkarte hau sortu zenez gerotik, 1975tik hona, urtero ospatu da jaia eta elkarteko kide asko bildu ziren bertara. Eurekin bat egin zuen baita ere Caracasko Eusko Etxea-ko talde batek, hiriburutik Valenciarako txangoa autobusez egin eta gero.

Valencia-Carabobo Begoña 2012

[Begoñako Ama Birjinaren eguna ospatzen Valencia-Caraboboko Eusko Etxean (argazkia Jazoera)]

Azkenik, ohiko ataletik kanpoko bi artikulu aipatuko ditugu, berriki hildako Eusko Etxea-ko bi bazkideren gomutan. Lehena, Guillermo Ramos, elkarteko presidente ohia zen. Bilbon1941an jaioa, Radio Euzkadi emankizun mitikoan lan egin zuen (Frankismoaren garai gogorrenetan 13 urtez etenik gabe egin zen emankizun klandestino hau Caracasetik Euskal Herri osorako). Beste bazkidea, Alatz Quintana, Bilbon jaioa zen ere eta bederatzi urterekin heldu zen Venezuelara. Bere aita gudaria izan zen 36ko gerra eta Santoñako konzentrazio-zelaitik ihes egitea lortu zuen.

-Jazoeraren 18. zenbakia deskargatzeko, jo hona, Valenciako Eusko Etxearen webgunera.