Rock Springs, WY, AEB. Zuretzat edo zure inguruko batentzat (pasa mesedez informazioa, guztion lankidetza beharrezkoa da): Euskara dakizula eta hobetu eta trebakuntza jaso nahi duzula Estatu Batuetan euskara euskal etxe batean irakasteko? Edo ezer gutxi dakizula eta beti ikasteko gogoa izan duzula baina orain arte ez diozula sekula ekin? NABOk eta Etxepare Euskal Institutuak aukera paregabea eskaintzen dizute euskara ikasteko Estatu Batuetan, Irakasle Formakuntza Taldea eratuz, 15 beka emanez musutruk parte hartzeko.
Programa asterokoa da eta hiru urte iraungo ditu, datorren irailean hasita. Online ematen da, eta sei hilabetero astebeteko barnetegi presentziala ere baitaratzen du, euskal etxe edo komunitatea duen hiri batean. Hirugarren urtearen amaieran, ikastaldia ongi probestu duten ikasle guztiak bi hilabete arteko barnetegi bat egingo dute Euskal Herrian, Lazkaoko Maizpiden, programaren kontu hau ere.
Proposamenaren bideoa, Mikaela DePoyster-Goikoetxeak eta Madalen Bieter-ek aurkeztua
Ikaskuntza prozesua doan da ematen zaien aukera baliatzen duten ikasle guztientzat. Ikasleek B1 euskara maila lortzen dute eta konpromisoa hartzen, hasiberrientzako 12 asteko lau ikastaldi emateko, euskal etxe batean edo NABO Euskara Onlinen, horretarako irakasle gisa dagokien soldata jasoz.
Ekimen honen helburua, Estatu Batuetan bertako jendeak trebatzea da euskara irakasle izateko euren euskal etxeetan. Aukera eder bat da, formakuntza guztia doan baita., irakaste trebatu eta eskarmentudunekin, ikasbide modernoekin, eta amaitzerakoan Euskal Herrira bidaiatuz Lazkaon barnetegia egiteko. Horren truke, irakasle izatea (ordainduta) bi urtez.
Informazio osoa NABOren Irakasle Formakuntza Taldea orrialdean. Gogoratu azken eguna izena emateko uztailaren 31a dela.
Lagun bati bidali
Komentarioa gehitu
