euskal diaspora eta kultura
2011/04/26
Datozen egunotan munduko hainbat euskal etxetan Aberri Eguna ospatzeko antolatutako ekitaldien berri ematen joango gara. Pazko igandean ospatzen da Aberri Eguna Euskal Herrian. Hala ere, euskal diasporako herrialde batzuetan astebete beranduago edo lehenago egin ohi da ospakizuna, ahalik eta jende gehiago bildu ahal izateko. Hau izan da aurten Buenos Aires probintziako Beti Aurrera Euskal Etxearen kasua. Chivilcoyko lagunek afari erraldoi bat antolatu zuten apirilaren 16an, hamaika euskaldunentzat hain garrantzitsua den efemeridea gogoratuz hitzez eta dantzez, inguru herrietako lagunak partaide.
2011/04/26
Hilabetero izango diren kontzertuek beti bilduko baitute euskal egileren baten piezaren bat. Bereziak dira baita ere aretoa zein instrumentua. Alde batetik, akustika ezin hobea du Euskal Echea Institutuko kaperak. Bestetik, Argentinan "Kilgen & Son" organo bakarra geratzen omen da eta hori Buenos Aires hiriburuko Sarandi kaleko Euskal Echea-ko kapera honetan dago. Bi baliabide hauek uztartuz, Organo Kontzertu Ziklo bat antolatu du Euskal Echea Institutuak. Emanaldiak hilero izango dira, lehenengo asteazkenean arratsaldeko 7etan eta publiko orokorrari zuzenduta.
2011/04/26
Eder Montero bilbotarrak eta bere emazte Alexandra Raij-ek gobernatzen dute New Yorkeko Txikito euskal jatetxea. Bikoteak chef lagun batzuk gonbidatu ditu eta Txakolinaren Egunaren pareko zerbait antolatu du New Yorken, aire librean, txoznetan bezala-edo, zenbakit jaki eta Euskal Herriko hainbat txakolin marka eskainiz, baita sagardo marka bat ere. Gertaera datorren igandean izango da, maiatzaren 1ean, arratsaldeko ordu batetik bostak arte. Inguruan egongo bazara, eta interesa baduzu, garaiz zaude oraindik, baina ez denborarik galdu errserba egiteko, lekua mugatua baita.
2011/04/26
Boiseko Euzkaldunak taldeko lagun talde batek hartu du parte elkarteak hilabetero antolatzen duen afarian, kasu honetan apirilekoa berezia izan delarik, elkartearen urtemuga ospatzen duena izan baita: 62 udaberri bete ditu aurten Boiseko Euzkaldunak-ek. Euzkaldunak izenpean Boiseko Euskal Etxea dago, Idahoko euskal elkarte garrantzitsuena eta Estatu Batuetako Mendebalde osoan aktibo eta emankorrenetakoa dena. Urtebetetzeko afari eta festa larunbatez, apirilaren 16an, egin zen Grove Kaleko egoitzan. Aiztan Artean taldeak antolatu zuen afaria eta Jesus Alcelay sukaldari oñatiarrak eta bere laguntzaileek prestatu zuten janaria.
2011/04/25
Bazko astelehena da gaur, jai eguna, eta urtero bezala Sarako (Lapurdi) herria euskal idazleen, irakurleen eta, oro har, kulturzaleen elkarretaratze gune bilakatuko da egun osoan, goizeko hamarretatik aurrera, Sarako Idazleen Biltzarraren 28. edizioa gauzaturik. Bereziki Ipar Euskal Herrian hondarreko urtean atera diren liburu eta disko emaitzak bildurik ezagutu nahi dituenak, Saran dauka aukera ona. Azken urteotako ohiturari segituz, EuskalKultura.com ere bertan izango da, bere stand-arekin, euskal diasporaren lekukotasuna emanez azokara hurbilduko duren guztiei. Agurtzen gaituzten irakurleei saritxo bat emango diegu.
2011/04/22
Datorren igandean Aberri Eguna dela-eta, FEVA Euskal Argentinar Erakundeen Federazioak (Euzko Argentinar Bazkun Alkartasunak, bere izen tradizionalean) ohar bat zuzendu die bere euskal etxe kideei, datak mundu osoko abertzaleentzat daukan esangura azpimarratuz, bakoitzak bere euskal izaera eta nortasunaren lekukotasuna emateko aukera dela esanez. Horrekin batera, federazioak testu bat bidaltzen du, Aberri Egunari buruzkoa, euskal etxeei eta euskaldunei euren inguruan, prentsa eta komunikabideetan zabal dezatela eskatuz.2011/04/22
Igande honetan da Aberri Eguna eta asko dira ospakizunak antolatzen ari diren euskal etxeak. Diasporako euskaldunen artean jai oso garrantzitsua da hau, historikoki oihartzun handia izan duena, eta euskal elkarte askotan ekitaldi bereziak antolatzen dira, izan meza xume bat, izan ehundaka lagun biltzen dituen bazkaria. Hitzordu hauetako asko asteburu honetan bertan izango dira, Berpizkunde Igandearekin batera, baina badira ospakizuna astebetez atzeratzen dituzten hainbat euskal etxe ere. Jarraian datorren iganderako iritsi zaizkigun azkeneko deiak bildu ditugu.
2011/04/22
Paraguaik ofizialki antolatzen duen lehenengo Euskal Astea egingo da datorren ekainean, Asunciongo Jasone Euskal Etxea antolatzaile. Euskal elkarteak ekainaren 1etik 4era luzatuko den progama prestatu du, Mercosur-eko herrialdeentzako Euskadiko Ordezkaritzaren laguntzarekin. Elvira Cortajarena ordezkaria bertan izango da, eta baita Euskal Herritik etorritako bi gonbidatu ere: Julian Celaya, Kanpoko Euskal Herritar eta Gizataldeentzako zuzendaria, eta Aizpea Goenaga, Etxepare Institutuko zuzendaria.
2011/04/22
Hitzaldia eskaini zuen joan den astelehenean Boiseko Euskal Museoan John Bieter historialari eta 'Boise State University'ko Historia Saileko kideak 'Euskal migrazioa Ameriketako Mendebaldean' gaitzat harturik. Hirurogei bat pertsonak hartu zuen parte saioan, gehienak euskal komunitateko kideak, giro hurbilean eta hamaika irudiz hornitutako emanaldian. Joan den otsailean Buenos Airesko euskal ikastaro batean irakasle ibilitako Bieter-ek euskaldunen emigrazioaren ezaugarri orokorrak eman zituen, euskaldunek munduan euren pausoak nora bideratu zituzten aipatuz.
2011/04/21
Tipi-tapa eta erritmoari tamaina harturik, lehenengo aldiz iritsi da azkeneko igande honetan Korrika AEBetako Idaho estatura. Estatuko hiriburura ere, beranduago iritsiko da, hilaren 30ean. Harro errezibitu dute, beraz, Mountain Home-ko euskaldunek, ohore hau. Bost bat kilometro egin zituzten euskararen alde, bertako 'Euskal Lagunak' antolatutako ekitaldian. Partaideen arteam adin guztietako pertsonak, umeak, helduak zein gazteak. Lasterketaren ondoan, famili giroko piknika egin zen. "Korrika hemen egin dugun lehenengo urtea izan da, eta pozik gaude, erantzun polita jaso dugu", azaldu diote Euskalkultura.com-i antolatzaileek.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
