euskal diaspora eta kultura
2011/12/23
Abenduaren 1ean ireki zituen bere ateak Argentinako hiriburuan 'Eusko Gudariak' Jateko Etxeak. Montserrat auzoan kokaturik, 'Eusko Gudariak'-ek Euskal Herriko plater tipikoak eskaintzen dizkie bere bezeroei, tartean, txipiroiak tintan, marmitakoa, saltsa berdeak eta Pirinioetako hainbat mokadu. Jatetxea astelehenetik larunbatera dago irekita, iluntzeko 8etatik 12ak arte. Euskal Herriko sukaldaritza dastatu eta giro euskalduna gozatu nahi baduzu, Buenos Aireseko Hipolito Yrigoyen kaleko 1400. zenbakian oso aukera polita izango duzu, diote jatetxeko nagusiek.
2011/12/22
Bigarren urtez antolatu du aurten Tucuman probintzia argentinarreko Yerba Buena herriak bertako Gizataldeen Azoka. Abenduaren 3an izan da eta iazkoan bezala, honetan ere anitz kolektibitatek hartu zuten parte jaialdian, tartean gizatalde andaluziar, alemaniar, boliviar, japoniar, arabiar, sardiniar, piamontear, friuliar, veneziar, laziar eta argentinarrak, euskaldunekin batera. Festa, herriko Marcos Paz Plazan egin zen, eta eguraldiak gehiegi lagundu ez bazuen ere antolatzaileek adierazi dute 2.500 bat lagunek bisitatu zituztela azokako standak.
2011/12/22
Idahoko Boise State Unibertsitateak (BSU) Euskal Ikasketa Programaren zuzendaritza postua bete nahi du. Horretarako euskal ikasketa arloan eskarmentua duen Historian lizentziatu baten bila ari da. Beharrezkoa da irakaskuntzan esperientzia izatea eta ingeles maila altua izatea. Euskara, gaztelania edo frantsesa ezagutzea kontuan izango da. Kontratuak urtebeteko iraupena izango du baina berriztagarria izango da. Boise State University-k 2005ean sortu zuen Euskal Ikasketa Programa eta 2007an Euskal Ikasketa Zentroa inauguratu zuen. Programak babes handia du Idahoko euskal komunitatean eta hazten ari da urtetik urtera.
2011/12/21
Gaurko Euskal Herriko Agintaritzaren Aldizkarian argitaratu du Eusko Jaurlaritzak Euskal Etxeentzako 2012. urteko diru-laguntzen deialdia. Oraingo honetan deialdi honetarako gorde diren diru baliabideak orotara 1.234.667 eurokoak dira. Deialdira biltzen diren programa eta jarduerak 2012 urtean gauzatu beharko dira eta abenduaren 31rako amaitu beharko dira. Eskabideak aurkezteko epea 2012ko otsailaren 29an bukatuko da.
2011/12/21
Gaur San Tomas da, jai egun seinalatua askorentzat Euskal Herrian, gabon merkatua bisitatu eta txistorra jateko ohitura tarteko. New Yorken, joan den asteburuan ospatu zuten. Izan ere, arrakastatsua izan zen oso Brooklyneko Eusko Etxean larunbatean egin zen jaia, eta jende andana bildu zen bertara. Olentzero ere bertaratu zen eta haur eta guraso asko erakarri zituen, eta haiek alde egin zutenean gazte jendeak hartu zuen lekukoa; goizaldera arte luzatu zen Santo Tomas eguneko besta eta ospakizunekin. New Yorkeko Txikito jatetxeak jarri zuen sagardoa eta Errioxako ardoa, Iban Ubarretxenak Olentzeroren bizarra, eta elkarteko kideek eta lagunek ondo pasatzeko gogoa. Argazki sorta honetan ikus daiteke eguneko giroa.
2011/12/21
Keiko Suzukik Filologia Hispanikoa ikasi zuen Nafarroako Unibertsitatean eta ikasketak amaituta bertan geratu eta nafar batekin ezkondu zen. Alaba bikiak izan zituenean euskara ikasteari ekin zion, orain dela hamabi bat urte. Egun, japoniera irakaslea da Iruñeko Hizkuntza Eskola Ofizialean eta duela urtebete "Maitasunezko oihua, munduaren erdian", Inma Errearekin batera itzulitako eleberria aurkeztu zuen Durangoko Azokan. Argia aldizkariak jarraian laburbiltzen dugun elkarrizketa egin dio.
2011/12/21
Urtarriletik aurrera AEBetan ikasi duten bi sukaldari gaztek, Ruth Selbyk eta Elisha Ben-Haim-ek, sei hilabeteko trebakuntza beka hasiko dute Martin Besarategi sukaldari ezagunak Lasarten duen jatetxe nagusian. Euskal Herriko eta AEBetako gastronomia arloko aditu eta elkarteek sustatzen duten 'Basque Stage' programaren hirugarren bekaren irabazleak dira. Beka honek gastronomia arloko hezkuntza eta trebakuntza sustatzea du helburu, aldi berean euskal sukaldaritza munduan ezagutarazten lagunduz. Mundu osoko sukaldari gazteek parte har dezakete programan.
2011/12/21
Euskara Munduan programaren baitan 2008an hasitako lau urteko proiektua bere amaierara heltzen ari da. Ikasle/irakasle talde honen azken barnetegia Tandil hiri argentinarrean izango da urtarrilaren 21etik 28ra. Ikastaroa bertako Gure Etxea-n burutuko da, HABE, FEVA eta euskal etxea bera antolatzaile. Etorkizunari begira, euskal etxeetan euskara irakasle berriak prestatzeko dagoen beharra aztertzen ari da FEVA. Bide batez, eta azken 20 urteetan Argentinan trebatu direnei zuzenduta, HABEko 1, 2 eta 3. mailako azterketak egiteko deialdia luzatu du Federazioak.
2011/12/20
Mota askotako ekintzak garatu dira aurten Patagonia argentinarreko euskal etxerik australenean. Rio Gallegos herriko Discepolín Kultur Etxe eta Artisauen Kooperatibarekin batera, gitarra, literatura eta eskulan tailerrak gauzatu ditu bertoko euskal erakundeak 2011 honetan. Ekimenen artean, paleta txapelketak ere oso arrakastatsuak suertatu dira Argentinako hegoaldean. Horrez gain, eta euskal etxeko kultur arloko arduraduna den Martha Goyheix-ek prentsaurrean jakinarazi legez, bertako ordezkaritza batek Necocheako Euskal Astean hartu zuen parte eta euren etxe propioa eraikitzen hasteko lehenengo pausoak eman ditu etxeko Zuzendaritza Batzordeak: 3 zenbakidun errepidearen ondoan lurra prestatzeko lanak egiten eta alanbratzen hasi dira.
2011/12/20
Saladilloko Itxaropen Euskal Etxeko lehendakariak aurtengo balantzea egin du eta 2012rako planak aurreratu ditu herriko ABC egunkariak islatu dituen adierazpenetan. Hector Altamirak aipatzen duenez pixkanaka baina beti aurrera ari dira euskal etxearen egoitza berriaren lanekin, eta 2012an ez bada, 2013an inauguratuko dira. EEaren dantza taldea berrabiatzea, sukaldaritza eta bestelako ikastaroekin segitzea xede dute berehala hemen den urterako, eta horretan lagungarri izan zaie doaike egoitzaren lanen amaiera progresiboa. Bonoaren zozketaz, eta zozketatzen zuen Euskal Herrirako bidaiaz, 056 zenbakiaren jabe zen Julio Wright-i egokitu zaio.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
