euskal diaspora eta kultura
2007/10/24
Artaburu Euskaltzale Elkartea Mar del Platako Denak Bat Euskal Etxeko kideen barnean sortutako erakundea da, euskara irakatsi eta sustatzeko helburuaz. Hori egiteko bideetako bat, hizkuntza eta euskal kulturari buruzko tailerrak dira eta Artaburuk gaur bertan ekingo dio bere bigarrenari. Nahi duten guztiek daukate tailerrean parte hartzeko aukera, doan eta sarrera libre. Kurtsoak bi orduko klaseak bilduko ditu astero, azaroaren 29ra bitartean, arratsaldeko zortzietatik gaueko hamarretaraino, asteazken edo ostegunetan.
2007/10/24
San Luis probintzia argentinarreko Villa Mercedeseko euskaldunen webgunea berritutik agertu da sarera, edo hobe esan, helbide berri batean sareratu dira, aurrekoa oraindik erretiratu gabe. Oraingoan zerbitzu berriak aurkezten dizkiote nabigatzaileari. Webguneak baditu, besteak beste, euskal prentsarekin loturak, gaurkotasuneko albisteak, arte-galeria moduko bat eta EHNAri buruzko informazioa.
2007/10/23
Hamaika Bide elkarteak joan den astean Donostian egin zuen Erbesteari buruzko Nazioarteko Mintegiaren balioespen positiboa egin du. Topaketan hainbat herrialdetako hogeita hamar bat adituk hartu zuten parte, jardunaldietara bildu ziren ikasle eta entzuleez gain. Mintegiaren agiriak urte bukaera aurretik argitaratuko dituzte Deustuko Unibertsitatearekin. Bestalde, ekimena beste herrialdeetara 'esportatuko' dute: 2008ko irailean Ingalaterran erbeste errepublikarrari buruzko mintegia antolatuko du Donostiako topaketan parte hartu duen Birminghameko Unibertsitateko taldeak.
2007/10/23
Bordeleko Eskualdunen Biltzarra elkarteak bazkide, lagun eta kolaboratzaile andana polita bildu zuen bere 60. urteurrenaren bestara. Euskal Etxea oso pozik agertu da ospakizunen emaitzarekin eta David Mujika bazkideak EuskalKultura.com-i azaldu dionez ekitaldi gehienak jendez gainezka ibili ziren. Ia berrehun pertsona bildu ziren Maison Basque-n eginiko urteurren afarira eta Mixel Etxekopar, François Rossé eta Bilika taldearen emanaldira sartu ezinik gelditu zen jendea.
2007/10/23
Kirolari familia honen lehen-gaiak aizkora, trontza, egurra eta harria dira. Diasporan ibiliak dira jada euren ibilbide emankorrari esker baina oraindik leku gehiago ezagutu nahi dituzte eta Euskal Herriko herri kirolak munduan zehar zabaldu. Garikoitz, Oihan, Donato eta Patxi Larretxea baztandarrek leku garrantzitsua lortu dute herri kirolen munduan eta orain euren burua eskaintzen dute Diasporako euskal etxe eta bestetan aritzeko.
2007/10/23
Franco hil berri itzuli zen Joseba Jaka Hego Euskal Herrira, egitasmo sendo batekin: Donostiako Parte Zaharrean liburu denda bat zabaltzea. Euskaraz edo Euskal Herriaz zegoen guztia bildu zuten metro koadro gutxiko denda horretan. Gaur bost megadenda eta beste hainbat denda daude Elkar sarean. Joxean Agirre kazetariak sinatzen du honako artikulua Gaur8ko orrialdeetan.
2007/10/22
Euskal Herrian bakoitzak bere esparruan ospea duten ia hogeita hamar jakitun, profesional eta sortzailek Jakiune, Euskal Herriko Zientzia, Arte eta Letren Akademia abiaraziko dute datorren ostegunean Donostian. Eusko Ikaskuntzak bultzaturik, ekimenak euskal gizartearen aitzinamendua eragiteko baliagarri izan daitekeen gogoeta-esparru erreferentziala bihurtzeko bokazioa dauka. Besteak beste, Euskadi Ikerketa Saridunak, Vianako Printzea Saridunak eta Eusko Ikaskuntza-Euskadiko Kutxa Saridunak biltzen ditu, baita literatura, zuzenbidea, antropologia, zientzia, zinea, musika edo literatura bezalako arlotako adituak ere.
2007/10/22
Mintzapraktikaren programaren mugimendua duela urte dexente sortu bazen ere, hau ere modernizatu egin da eta mintzapraktika.org webgunea aurkeztu berri da, aparta Diasporako hainbat euskara ikasleen egoerarako. Izan ere, egitasmo honek mintzapraktika taldeentzako erreferente eta plataforma bilakatu nahi du. Norberaren herrian mintzapraktika talderik aurkitzen ez duenak euskaraz hitzegiteko aukera beregana dezake internet bidez Skype bidezko taldeei esker. Aukera berri bat ireki dute klaseetan ikasitakoa behar bezala finkatu eta praktikatu nahi dutenentzat. Hori bada zure egoera, zergatik ez saiatu.
2007/10/22
Joan den irailaren 29an Zavaleteada itzel batean elkartu ziren Bartolome, Agustin, Antonio eta Jose Maria de Zavaleta anaien ondorengoak. Gipuzkoako soraluzetarrak jatorriz, XIX. mendeko azken hogeitamar urteetan heldu ziren Argentinara. Haien ondorengoak 2005eko martxoan elkartu ziren azken aldiz, Arrecifes hirian, eta bi urte luze elkar ikusi gabe, familia osoa Ramalllon bildu zen berriro joan den irailean. Bertara, Argentinako hainbat hirietatik eta Mexikoko Moreliatik etorritako 190 pertsona inguru bildu ziren, bazkari goxo bat dastatzeko aitzekiaz.
2007/10/22
Berria llaburrean eman genuen, baina oraingoan irudiak iritsi zaizkigu Chaco probintzia argentinarretik, Arkaitz Mendoza pianista donostiarrak Resistencia hiriburuan urriaren lehenean 'Yolanda P. de Elizondo' Musika Eskolaren alde eman zuen kontzertuaz, egitaraua gehienbat aita Donostiaren obrek osatua. Chacora eginiko bidaian Arkaitz Mendozak, Donostiako Musika Eskolako irakasle izateaz gain kantari eta koru zuzendari ere badenak, bertako alkate Aida B. Ayalak eman zion 'garrantzizko pertsonaia hirira bisitan etorria' izendapena jaso zuen eta aukera izan zuen bi hitzaldi eskaintzeko, musika ikasleekin lan-bilkura bat egiteko eta Toba etniako kideek osatzen duten Cheelaapí abesbatzaren entsaio bateko partaide izateko.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
