euskal diaspora eta kultura
2008/07/10
Akitania probintzian dagoen Berenx izeneko herria izango da datorren abuztuaren 18an Iparralde eta Frantziako genealogistek egingo duten bilkuraren egoitza. Hitzordu honetan, gainera, euskal Diasporako hainbat kide ere izango dira, urtetan internet bidez eginiko ikerketetan aurkitutako familiak eta sorterriak ezagutu nahian. Bilkura informazioa trukatu eta sarean ikerketak egiteko laguntza eskaini dieten ikerlariak ezagutzeko aukera aparta izango da. Genealogian interesa duen orori egiten diote parte hartzeko gonbitea antolatzaileek; izena emateko epea irekita dago.
2008/07/10
Euskal Herrian eta Diasporan ere ospe handia duen Juan Mari Arzak sukaldariak jasoko du Eusko Jaurlaritzak eta Euskadiko Kutxak ematen duten Euskal Herritar Unibertsalaren saria. Hamasei hautagairen artean donostiarra izan da bozkatuena, besteak beste, bere lanaren bidez Euskal Herriari buruzko irudi positiboa eskaintzen duelako atzerrian. Horrela, donostiarra Ainhoa Arteta soprano tolosarra, Pedro Migel Etxenike zientzilaria eta Bilboko Guggenheim Museoa bezalako saridunen zerrendan sartu da. Dononstiako jatetxea zuzentzeaz gain, Mexikoko Tezka jatetxeetan bere zigilua jarri eta aholkulari gisa dabilen sukaldariak datorren urriaren 7an jasoko du saria Gasteizen.
2008/07/10
Mikel Alonso sukaldari irundarrak hamar urte daramatza Mexikoko hiriburuan bizitzen. Hasiera batean sei hilabeteko egonaldia zena hamar urtez luzatu du, lurralde azteka bere etxea bihurtuz. DFn 'Biko' izeneko euskal sukaldaritza garaikideko jatetxea ireki zuen Bruno Oteiza sukaldari donostiarrarekin batera. Lokala bertako Euskal Etxeko egoitzatik gertu dago eta ohiko bezero asko euskal elkarteko lagunak dira. Irekieraren lehen urteurrena ospatu baino lehen, 'Restaurant' aldizkari britainiarraren munduko 100 jatetxerik onenen zerrendan sartu dute, 89. postuan. Noticias de Gipuzkoa egunkariak sukaldari gaztea elkarrizketatu du, jarraian itzuli eta laburtzen dugun artikuluan.
2008/07/09
Oregon estatuko Jordan Valley herriak museo berri bat du ekainaren 21az geroztik, Elorriaga familiaren ostatua izan zen etxean. Eraikina eta bertan erakusgai dauden tresna, objetu eta oroigarri gehienak John Elorriagaren dohaintza izan dira. Elorriaga House Museoa izenez ezaguna izango dena ION (Idaho, Oregon, Nevada) Heritage Museum erakundearen parte bihurtu da, bisitariei euskal-amerikar kultura eta bertan etxea egin zutenen bizimodua erakusteko asmoz. Inaugurazio ekitaldian Idaho, Nevada eta Oregon osoko lagun asko bildu ziren, euskal-amerikar komunitateari eginiko opari hau behar den moduan ospatzeko.
2008/07/09
'Elaberrietan istorioak bizitzen dituzten historiako emakumeak' titulua daraman ziklo literarioa etzi hasiko da Tres Arroyoseko Hiru Erreka Euskal Etxean. Topaketak lau saio izango ditu eta bertan parte hartzen dutenek latinamerikar historiako garai latzetan garrantzia izan duten bost emakumeri buruz gehiago jakiteko aukera edukiko dute elaberrien bidez: Laura Esquivelen bere lanean jasotako 'Malinche'; Silvia Miguensen 'Manuela Saenz'; 'Camila O´Gorman' Marta Merkinen ikuspegitik eta Julia Alvarezek idatzitako 'Mirabal ahizpak'.
2008/07/08
Saladilloko Euskal Etxeak bere lehenengo hamar urteak ospatuko ditu datozen asteotan. Argentinar hiri honetan euskal kultura sustatzen lan eskerga egin du elkarteak eta dagokion moduan ospatzeko asmoa dute bazkideek, bihartik hasita. Lehen ekitaldia euskal taberna bat izango da eta ondoren, uztailaren 23an, Mikel Ezkerro irakasleak 'Los vascos: pasado, presente y futuro' izenburudun mintzaldia eskainiko du. Azkenik, abuztuaren 17an egingo da ekitaldi nagusia, elkarteko kide eta lagunentzako bazkaria, Apeadero klubean.
2008/07/08
Bi urteko prozesu luzea izan da, baina azkenean UNESCOk, Nazio Batuen Hezkuntza, Zientzia eta Kulturarako Erakundeak, Gizateriaren Ondarea izendapena eman zien atzo Quebec-en Altxerri, Ekain eta Santimamiñe kobazuloei, Kantauri Isurialdean Paleolitoko Artea duten beste 12 haitzuloekin batera. Arantxa Arzamendi, Eusko Jaurlaritzako Ondare zuzendaria, Quebec-eko bilkuran izan da eta bertan aipatu duenez izendapen hau ‘oso onuragaria’ izango da euskal kobazuloentzat, ‘nazioarte mailako kultur eta turismo zirkuitoetan’ sartzeko aukera emango dielako.
2008/07/08
Mexikoko VascosMexico foroaren itxiera atzo iragarri zuen bere koordinatzaile eta zuzendari den Jaione Arrieta Galarraga euskal-mexikarrak, arrazoi ekonomikoak medio. Iragarpena egin orduko kanpaina bat hasi zen Mexikoko euskal komunitatearen inguruan --Mexikon zein Euskal Herrian-- dirua biltzeko, bertako euskal komunitatearen lokarri eta biltzaile den foroak zabalik eta bere lan eskerga egiten jarrai dezan. VascosMexicok ez du batere laguntza ofizialik jasotzen eta 407 kide biltzen ditu, foroan, eta 1.460 erabiltzaile erregistratu webgunean. Kontu korrontea zabalik dago lagundu nahi duenarentzat.
2008/07/07
Hilabete gutxi baino ez ditu, baina Kanbon sortua den Aitamatxi argitaletxeak kalean du jada bere lehen lana: 'Basky Surf Party' elaberria, Patxy Kennedy idazle nevadatar gaztearen lehen lana. Franck Sallaberry lapurtarrak gidatzen du argitaletxea eta urtean zehar argitaratzeko beste hiru lan dituzte prest: Idahoko egile batena, euskal argentinar idazle batena eta Miamin bizi den beste euskaldun batena. 'Euskal literaturan Atxaga bezalako ospe handiko idazleak daude, baina baita ezagutarazi nahi ditugun Diasporako egile gazte asko ere. Garrantzitsuena istorio onak aurkitzea da', azaldu dio Sallaberryk EuskalKultura.com-i. Lehen liburua --frantsesez-- salgai dago jada Iparraldeko liburudendetan eta sarean; eta datozen hilabeetan euskarara eta gaztelerara itzuliko dute.
2008/07/07
Mexikoko Euskal Etxeak egun batzuk aurreratu zuen Iruñeko San Fermin jaiaren ospakizuna. Atzo eman zitzaion hasiera Nafarroako hiriburuan txupinazo tradizionalaren bidez, baina euskal-mexikar elkarteak Juan Jose Arrieta nafarrak eta bere laguntzaileek prestatutako bazkari batekin ospatu zuten festa larunbatean. Partaide gehienek arropa zuria eta zapi gorriarekin girotu zuten topaketa, eta besteak beste, zezen puzgarria eta txaranga bati esker, Sanferminak era atsegin eta alaian ospatu ahal izan zituzten.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
