euskalkultura.eus

San Frantzisko, Estatu Batuak. Jaime neska ezaguna da bere adineko neska-mutiko euskal-estatubatuarren artean, zenbaitetan hartu baitu parte NABOk urtero antolatzen duen Udalekun, lehenik ikasle gisa eta behin 10-15 urteko adin hori pasata, begirale laguntzaile gisa. Nafarroa Beheraino daramatzaten bere euskal erroen deia Kaliforniako Los Banos-en (San Frantzisko hegoaldean), bertako Euskal Etxean entzun zuen, familian zein euskal elkarteko ekitaldietan. Izan ere, dantzaria eta Los Banoseko euskal dantza taldeko kide da, eta harreman estua ere izan du San Frantziskoko euskal etxeko Zazpiak Bat dantzariekin, lagun ugari dituelarik haien artean.

Neska aktiboa da euskal komunitatean, eta NABO gazte mailan egiten ari den ahaleginean partaide eta iritzi-emailea. Bere beste ezaugarri nabarietako bat, aurpegia argitzen dion irri polita da, beti umore onez agertzen baita, laguntzeko eta parte hartzeko prest.

Eta oraingoan berri txarra, tumore gaizto bat harrapatu baitiote bihotzaren ondoan, bizkarreko mina zeukala medikuarengana joan ondoren. Berehala eraman zuten Stanford-eko ospitale espezialdu batera, non medikuek ez duten oraino erabaki nola ekingo dioten aurrean daukaten panorama txarrari.

Ugari dituen lagunek agur beroak eta maitasunezko besarkadak bidali dizkiote, eta aurrera egiteko kuraia mezuak. Beste lagun batzuk mezuak sareratu dituzte internetera, nahi duenak otoitz egin dezan lehen bait lehen senda dadin. Geuk ere bat egiten dugu sostengatzeko eta animatzeko mezuekin. Aitzina, Jaime, zurekin gira!