euskalkultura.eus

Villa Mercedes, Argentina. 'Amancaya' ('zitoria' izeneko lorea, kitxua hizkuntzan) San Luis probintziako Villa Mercedeseko Euskal Etxeak aurrera eraman nahi duen proiektuaren izena da. Proiektuaren helburua kulturgune berri bat sortzea da Villa Mercedes-en, hiri eta probintzia mailan eragina izango duen proposamen bat.

Izan ere, kulturgune berriak ezaugarri berezi bat izango du: “Villa Mercedes eta Gipuzkoako Ordizia herriek elkarren arteko senidetzea sinatu genuen 2007an. Beraz, gure artean dagoen harreman estua kontuan hartuz eta hirian daukagun ur tankeak Ordiziako plazaren nolabaiteko antza daukala ohartzean, pentsatu genuen proiektu polita izango litzatekeela tankea eta bere ingurua berritzea Ordiziako plazaren itxura emanez”, azaldu dio EuskalKultura.com-i Julio Esnaola euskal etxeko kideak.

Baina berritze lanen xedea ez da lekua hobetzera mugatzen. Izan ere, EuskalKultura.com-ek kontsultagai izan dituen planaren oinarrietan azaltzen denez, Ordiziako plazaren 'giroa', eta batez ere duela bostehun urte asteazkenero Ordizian egiten den azokako giroa --aktibotasun, eragiletasun eta ekonomia eta kulturaren bultzatzaile gisa-- erreproduzitzea ere bada asmoa. Horren baitan, Villa Mercedeseko abeltzain eta landa eremuko ekoizle txikien eta artisauen produktuak bultzatu nahi dira.

[Julio Esnaola tankearen eraikinaren eta egituraren barruan (argazkia EE)]

Horretaz gain, eta beste batzuen artean, ‘Amancaya’ren baitan, “hiriko ondare arkitektonikoaren balioa handitzea, tankeko beheko pisuan hiriko museo historikoa eraikitzea, ekitaldi kulturak antolatzea, Ordizia eta Villa Mercedesen arteko trukeak sendotzea eta turismoa sustatzea” ere badira proiektuaren helburuak.

[Julio Esnaola eta Liliana Rouan, Magdalena Mignaburu eta proiektuan lan egin duten arkitektoekin  (Mignaburu EE)]

Azpimarratu behar da ideiaren sortzailea Villa Mercedesko Euskal Etxea bera dela, eta erakundearen izenean, Julio Esnaola eta Liliana Rouan direla proposamenaren arduradunak. Haiekin batera Mario Cocuche eta Juan Ramirez Almanza arkitektoak arduratu dira planoez eta Magdalena Mignaburu lizentziatua planaren oinarriak idazteaz. Proiektua bihar aurkeztuko zaie Mario Merlo alkateari eta Jorge Diaz gobernadoreordeari. Euskal etxeko kideen eta herri-agintarien arteko elkarretaratzea iluntzeko 7etan izango da.