euskalkultura.eus

Cracovia, Polonia. AEMI (Association of European Migration Institutions) elkartearen urteroko bilkura iragan larunbatean egin zen Cracovian, eta aurretik, asteazkenetik ostiralera migrazioari buruzko mintegia egin zuten bilkurara bildu ziren adituek. Horien artean izan ziren Benan Oregi, Eusko Jaurlaritzako teknikaria, eta Oscar Alvarez Gila historialaria (UPV-EHU). Oregik eta Alvarez Gilak txosten bat aurkeztu zuten mintegian, Txinako euskal emigrazioari buruzkoa.

Aurkezpenean azpimarratu zuten Txinako euskal emigrazio txikia izan dela kopuruz, baina talde zehatz eta homogeneoak izan direla beti: hala nola hastapenetako misiolariak, Jai Alai jokalariak eta gaur egungo gazte profesionalak, 2004ean Shanghaiko Euskal Etxea sortu zutenak.

[Oskar Alvarez Gila (ezkerrean) eta Benan Oregi (bizkarrez) AEMIko mintegian egin zuten aurkezpenean (argazkia AEMI)]

Mintegiaren ostean Urteroko Bilkuran AEMI gaur egun sustatzen ari den hiru egitasmo nagusien berri eman zen: Migraport, dokumentuen digitalizazio, Europako migrazioen mapa eta AEMIren webgune berria (azken hau prest da jada www.aemi.eu helbidean).

Benan Oregik EuskalKultura.com-i agertu dionez, garrantzitsua da euskaldunak ere elkartean eta horrelako topaketetan egotea. "Bertan egon behar dugu; besteengandik ikasteko eta ideiak hartzeko ona da. Gauza batzuetan egiteko asko dugu, eta beste batzuetan aurretik goaz, adibidez, digitalizazio kontuetan eta kanpoko euskaldunekin dugun harreman sareari dagokionez.  Herrialde batzuentzako inbidiagarria da guk euskal etxeen bidez dugun harreman sare estua", esan du.