euskalkultura.eus

Habana, Kuba. Bertako erakundeekin egindako kultura truke bati esker entzezlanak eta tailerrak ari dira eskaintzen egun hauetan Kuban Gipuzkoako 'Oihulari Klown' konpainiako Irene Celada, Ander Muñoz eta Virginia Imaz. Antzerki ikuskizunak ‘Sex o no sex’, ‘Mitología Vasca’ eta ‘Pronoia’ ikuskizunak dira, eta horiekin batera, dantzak eta euskal mitologia batzen dituen egitaraua ari dira garatzen irlan, tailerrekin batera, euskal artistak, goi mailako aretoetan, kultura zentroetan, eskoletan eta nagusien etxeetan. Aipatzekoa, Habanako euskal gizataldearekin harremanetan daudela eta saio batzuk antolatu dituztela ere elkarrekin.

Ezkerrean,'Oihulari Klown'eko Irene Celada, Ander Muñoz eta Virginia Imaz; eskuinean, Nave oficio de la Isla kultura gunean

Ezkerreko argazkian, Cienfuegosen egindako emanaldia; eskuinekoan, klown performancea nagusien etxean

Virginia Imaz ipuinak kontatzen, Habanako Historialariaren Bulegoarekin lankidetzan 

Orain arte eskainitako emanaldi eta tailerrei buruz, Habana hiriburuan 'Comunidad Creativa Nave Oficio de la Isla' eta Abdala Kultura Etxean aritu da euskal hirukotea. Eta Cienfuegos hiriraino ere iritsi dira, bertako Terry Antzokian ‘Sex o no sex’ eta ‘Mitología vasca’ taularatu dituztelarik. Landu duten zirkuituan, eskolak eta zaharretxeak ere hautatu dituzte euren proposamenak gauzatzeko.

Euskal kolektibitatearekin batera

Jo eta ke aritu dira irlara helduz geroztik aktore eta klownak egitarau estua patrikan eta asteburu hau ere berezia antolatu diete, Habanako euskal gizataldearekin eta euskal gizataldearentzat jardungo dutelako. Programak, La Bombilla Verde-n Dantza Tailer bat markatzen du lehenik eta ‘Pronoia’ ikuskizuna. Informazio gehiago, hemen. Eta igandean, Habana Zaharreko Centro Andaluz-en (Paseo del Prado eta Virtudes kaleetan), Dantza Tailerra (16:30ean) eta euskal mitologiari buruzko ipuinak (18:00etan), kasu honetan Kubako Euskal Etxea (Asociación Vasco Navarra de Beneficencia de La Habana) lagun antolatua.

Euskal Herrira itzuli aurretik, beste eskola bat bisitatuko dute, oraingoan Habanako Colegio Español, astelehenean, irailaren 22an; eta asteartean, 23an, ‘Pronoia’ antzezlanaren beste emanaldi bat eskainiko dute, Habanako Arte Eskolan.

- 'Oihulari Klown' taldea Interneten: Artekale
- Instagram, oihulariklown