euskalkultura.eus

Mar del Plata, Argentina. Topaketan parte hartu zutenak hauek izan ziren: NABOren aldetik Mary Gaztambide lehendakariak; John M. Ysursa sustatzaileak eta Izaskun Kortazar euskara arloko koordinatzaileak. FEVAren aldetik bertaratu ziren Felipe Eiheragibel lehendakaria; José Orbaiceta eta Mariano Ayesa lehendakariordeak, Marta Abarrategui idazkaria; Ricardo Basterra diruzaina; Mariluz Artetxe lehendakari ohia; Gabriela Mendia euskara koordinatzailea eta Miren Arozarena administrazio gerentea.

Eusko Jaurlaritzaren aldetik Josu Legarreta Euskal Gizataldeekiko Harremanetarako zuzendariak hartu zuen parte eta baita Aholku Batzordeko kide den Carlos Sosak ere. Bilkuraren egoitza Mar del Plata zenez, bertako Denak Bat Euskal Etxeko zuzendaritza batzordea ere aritu zen, José Martín Azarloza lehendakaria buru.

Argentina-AEB trukeak

Hiru egunetako lana oso oparoa izan zen eta gai askotan erabakiak adostea lortu zuten ordezkaritzek. Hartutako erabaki guztiak  FEVA eta NABO-ren webguneetan irakur daitezke osotasunean. Azpimarragarrienetako bat bi erakundeek gazte arloan lortutako hitzarmenak izan ziren.

NABOk eta FEVAk dantzari eta txistulari gazteen trukeak egingo dituzte bi urtetan behin: AEBetako dantzariak Argentinako Euskal Astean izango dira eta Argentinako dantzariak Estatu Batuetako Euskal Astean. Horrezaz gain FEVAko hiru haurrek eta bi irakaslek aurtengo Udalekun parte hartuko dute, Kaliforniako Chinon. Era berean, FEVAk aurten Bahia Blancan egingo den Euskal Astera eta Llavallolgo Haur Topaketara biltzeko gonbidapena egin die NABOko gazte eta haurrei. 

2010an Boisen

Bilkuran jorratu zen beste gai garrantzitsu bat 'Euskal Erakundeen Elkartea' delakoaren sorrera izan zen. Nazioarte mailako euskal etxeen federazio bat litzateke eta FEVA eta NABO, elkartearen estatutuen zirriborroa prestatzen hasi dira. Datozen hilabeteetan munduko beste euskal elkarteei bidaliko diete, bakoitzak bere ekarpena egin dezala eskatuz, eta urrian Bahia Blancan egingo den sortze-batzarrean parte hartzeko gonbidapena luzatuko diete.

Era berean hurrengo bilkuraren data eta lekua ere erabaki zuten FEVAk eta NABOK: 2010ean Boisen (AEB). Euskal elkarte guztiek bertan parte hartzeko gonbidapen iraunkorra dute.