euskalkultura.eus

Buenos Aires, Argentina. Rio de la Platako xareko pilotari onenei eman zien abegia Buenos Airesko Club Vasco Argentino Gure Echea-ko trinketeak joan den maiatzeko azken larunbatak, Nazioarteko Hexagonala jokatzeko. Txapelketak modalitate honek historikoki senidetu izan dituen Argentinako eta Uruguai herrialdeetako xarelaririk puntakoenak bildu zituen. Kirol-maila bikaina eta euskal pilotaren berezko lagunarteko giroa uztartu ziren jardunaldian, partida bakoitzean zaleen berotasuna lagun.

Guztira etxeko lau bikote eta Uruguaiko bi aritu ziren elkarren aurka. Lehen multzoan, A. Correa, S. Gramajo, I. Gil Nájera, A. Echeverri, A. Moller eta A. Fernández lehiatu ziren; bigarrenean, berriz, G. Amoreo, A. Gil Nájera, F. Pombo, A. Caffera, H. Rodríguez eta M. Coluccio. Partida gogor eta borrokatuen ostean, A. Correa eta S. Gramajo suertatu ziren txapeldun, finalean A. Echeverri eta Iñaki Gil Nájera mendean hartuta. Kirol-ekitaldiak, gainera, modalitateko izen historikoen bultzada jaso zuen, bertan egon baitziren Roberto Elías, Ricardo Labat, Martín Labat eta Eduardo Frigeriorena.

 
A. Correa, S. Gramajo, A. Echeverri, I. Gil Nájera eta Mikel Gil Nájera

Gure Echea elkarte antolatzaileak La Platako Euzko Etxea-ren laguntza estua izan zuen egitasmo hau aurrera eramateko. Azken elkarte hau funtsezkoa da xarearen sustapenean, Hego Amerikako lehenengo eta bakarra den Xare Eskola bultzatzen baitu. Era berean, hitzorduak babes instituzional zabala jaso zuen: Argentinako Pilota Konfederazioaren izenean Mikel Gil Najera selekziogilea bertaratu zen, eta Uruguaiko Pilota Federaziotik Alvaro Caffera presidenteordea.

Nazioarteko egutegiari begira, txapelketa hau entrenamendu zorrotza eta bikaina izan da pilotarientzat. Gure Echea-ko presidenteorde Bernardo Dupuyk EuskalKultura.eus-i adierazi dionez, “Hexagonala, xarearen hazkundea bultzatzeko antolatu dugu, bai klubean eta baita herrialde osoan ere”. Horrez gain, kirolariak indartzeko eta Munduko Txapelketarako beroketa gisa balio izan duela gaineratu du Dupuyk. Ez baita ahantzi behar Munduko Txapelketa nagusia datorren urriaren 15etik 24ra bitartean jokatuko dela Buenos Airesen eta Colonia (Uruguai) hirian.