euskalkultura.eus

Miami, Florida, Estatu Batuak. Bere kokapen geografikoa eta ezaugarriengatik Florida eta zehatzago Miami eta bertan sortu ziren euskal etxeek harreman handiagoa izan dute zuzenean Euskal Herriarekin edota Mexiko eta jai-alaia jokatu izan den lekuetako euskal komunitate eta euskal etxeekin, tartean New Yorkeko Eusko Etxearekin, eta ez hainbeste kilometrotan eta kulturan urrunxeago geratu izan zaien Kalifornia eta Estatu Batu mendebaldekoekin (bertan kokatzen da AEBetako euskal komunitatearen ardatza, eta NABO osatzen duten euskal elkarteen %90a). NABOko kide bilakatzea beti hor egon den gaia izan da, baina orain arte sekula ez zaio behar bezala eutsi.

Floridan historikoki, jaia-alaia gailurrean egon zenean, euskal etxe gehiago egon badira ere, gaur egun Miamikoa da geratzen den bakarra. 1987an sortua, momentu batean Miamin zegoen beste euskal etxe bateko kideak ere hartu zituen, gaur egungoa osatzeko. Eusko Jaurlaritzak 1997an onartu zuen ofizialki eta egoitza badu, errentan. Bere izenak nolabait islatzen duenez --Txoko Alai-- txoko edo sozidade gisa funtzionatzen du hein batean, sorrera jai-alaia garai onenetan zegoenean euskal pilotarien txoko gisa izan baitzuen.

NABOrekiko harremanak sekula ez ditu txarrak izan, eta ugaldu eta areagotu egin dira joan den urtean, Izaskun Kortazar koordinatzaile eta Martin Goikoetxea arduradun daukan NABOren euskara eskolen sarean integratu baita Txoko Alai, gaur egun aurrez-aurreko euskara eskolak astean behin bi orduz eskaintzen dituelarik, Aitzol Azurtza irakasle donostiarraren eskutik. Argi hasi dira ikusten Miamin, mundu globalizatu honetan euskal etxeen geroa, handiena eta txikiena, baina bereziki txikiena, arazo amankomunei erantzun amankomunak ematean dagoela.

NABOk dagoeneko Miamiko Euskal Etxea federazioko kide izateko eskaera hartu badu ere, litekeena da gaia ez tratatzea datorren aste hondarrean San Frantziskon egingo duen bileran, eta uztailerako uztea, Boisen tokatzen den NABO Biltzar Nagusi edo Konbentziorako --askoz jendetsuagoa--, honela proiekzio eta oihartzun askoz handiagoa hartuko bailuke bazkide berriaren sartzeak, eta aukera emango luke behar bezalako ordezkaritza bat bil dadin Miamitik hurbildua.

-Miamiko Euskal Etxea: www.euskaletxeaofmiami.org