euskalkultura.eus

Boise, Idaho, Estatu Batuak. Ia segurutzat jotzen da Martxelo Otamendik ezin izango duela Jaialdi 2010ean parte hartu, Jaialdiko lehenengo ekitaldiak dagoeneko hasita zaila baita Estatu Batuetan sartzeko bisatua garaiz iristea. Herrialde honetan sartzeko ezinbestekoa den ESTA (Electronic System for Travel Authorization) papera, internet bidez lortu behar dena Estatu Batuetara bidaiatu aurretik, ukatu egin zioten Martxelo Otamendiri, eta honek orduan, bisatu profesionala eskatzea erabaki zuten, Boisetik Jaialdiko kronikak bidali eta blog bat osatzeko asmoa zuenez. Bisatuari buruzko erantzuna jasotzeak, ordea, aste batzuk har ditzakeela erantzun zioten Otamendiri.

EuskalKultura.com Eusko Jaurlaritzako Kanpo Harremanetarako Idazkaritza Nagusiarekin mintzatu zen atzo, bulego horretako arduraduna, Guillermo Echenique idazkari nagusia, Lopez lehendakariarekin San Frantziskon dagoenez, eta honek baieztatu zuen Berriako zuzendaria harremanetan jarri zela eurekin joan den asteko asteazkenean, administrazio estatubatuarraren aurrean ezer egiterik bazuten-edo, eta bere bulegoak hala egin zuela, esan zuen Echeniquek, Jaurlaritzatik "euren eskuetan zegoen guztia egin" zutelarik egoera irtenbidetze aldera, nahiz eta "hau guztia joan den asteazkenean gertatu zen, Jaialdi hasteko astebete baino gutxiago geratzen zela", esan zion atzo asteartea Echeniquek buletin honi, Kaliforniako iluntzeko bederatzi zirela, asteazkeneko seiak Euskal Herriko orduan.

[Gaiari buruzko bideoa, Idahoko 7. kanalak osatua. Irudian, Dave Bieter alkate boisetarra]

Kazetari tolosarrak Dave Bieter Boiseko alkatearen eta Idahoko estatu-idazkari ohi Pete Cenarrusaren sostengua jaso du, Boiseko euskal komunitateko buruzagi diren bi euskal-amerikarrok gutuna bidali diotelarik Estatu Batuetako Madrilgo enbaxadariari Martxelo Otamendiren eskakizuna sostengatuz, eta bere alde hitz eginez arazo honen aurrean. Beste jende talde bat ere mugitzen hasi da Boisen norabide berean, elkartasuna adieraziz kazetariari.

Martxelo Otamendik zalantzarik ez du izan arrazoi politikoak ikusterakoan jarrera honen atzetik.